Byltyr ártúrli nysandarda jarylǵysh qurylǵylar ornatylǵany týraly jalǵan habarlama bergenderge qatysty 247 qylmystyq is tirkelgen, dep jazady Egemen.kz.
IIM málimetinshe, «jalǵan terrorızm» faktisi boıynsha 48 kúdikti ustalǵan. Onyń ishinde kámáletke tolmaǵan 15 bala bar. Osy mazmundaǵy jalǵan habar bergen 13 azamat qylmystyq jaýapkershilikke tartylǵan.
Eger «terrorızm» týraly jalǵan habarlamalardy jiberýshi qylmystyq jaýapkershilik jasyna jetpese balalardy tárbıeleý sharalaryn oryndamaǵany úshin ata-anasy ákimshilik jaýapkershilikke tartylady.
«Terrorızm aktisine daıyndyq týraly kórineý jalǵan habarlama bergeni úshin 5 myń aılyq eseptik kórsetkish mólsherinde aıyppul, sondaı-aq 5 jylǵa deıin bostandyqty shekteý nemese bas bostandyǵynan aıyrý jazasy qarastyrylǵan», dedi IIM ekstremızmge qarsy is-qımyl departamenti basqarma bastyǵynyń orynbasary Almas Talqanbaev.
Jalǵan aqparat saldarynan obektige zaqym kelse, shyǵyndy sot sheshimi shyqqanda habar bergen azamat óteıdi.