«Astana Opera» sahnasynda Nomad Inspiration baǵdarlamasynyń premerasy ótti. Mádenıet jáne aqparat mınıstrliginiń qoldaýymen uıymdastyrylǵan kesh baletmeıster Sultanbek Ǵumardyń zamanaýı horeografııalyq jumystary men «HasSak» etno-folklorlyq ansambliniń biregeı aspaptyq mýzykasyn biriktirgen naǵyz shyǵarmashylyq tájirıbege aınaldy.
Baǵdarlama aıasynda «HasSak» ansambliniń mýzykasyna shyǵarylǵan «Toıbastar» jáne «Aralym», sondaı-aq kompozıtor Hamıt Shanǵalıevtiń mýzykasymen «Álem» nómiri oryndaldy. Atalǵan keshte kórermen «HasSak» ansambli mýltıaspapshylarynyń ónerine kýá boldy. Mýzykanttar týyndylardy jeke jáne
maestro Rýslan Baımýrzınniń jetekshiligindegi «Astana Opera» sımfonııalyq orkestriniń súıemeldeýimen oryndady. Baǵdarlamaǵa «HasSaqnama», «Uly Jibek joly», «Záýren», «Ańsaý», «О́rleý», «Turan jolbarysy», «Tartý» sekildi shyǵarmalar engen.
«Aralym», «Álem» jáne «Toıbastar» horeografııalyq nómirleri kórermenniń shynaıy yqylasyna bólenip, óziniń kórkemdik mánerliligimen jáne biregeıligimen tánti etti.
Keshti «Toıbastar» nómiri ashyp, qazaqtyń ulttyq naqyshtaryn kórsetip, merekelik kóńil kúı syılady. Jarqyn qoıylym jas bıshilerdiń 20 jubyn biriktirip, olardyń kúrdeli de kóztartarlyq qımyldary zamanaýı kórneki sheshimdermen aıshyqtaldy. Dástúrli saryn dızaıner Darıǵa Taıshyqovanyń kostıýmderimen úılesim taýyp, nómirge aıryqsha boıaý ústedi.
Al «Aralym» nómirinde horeograf er adam beınesin jermen, áıelder bolmysyn sýmen baılanystyryp, qorshaǵan orta men adamı qarym-qatynastarǵa uqypty qaraý kerektigin meńzeıdi. «Álem» týyndysynda áıeldiń otbasynyń qorǵaýshysy ári tutas qoǵamnyń uıytqysy retindegi beınesin kórsetedi. Tomırıs jáne Domalaq ana syndy ańyzǵa aınalǵan tulǵalardan shabyt alǵan qoıylym qazaq áıelderiniń danalyǵyn, batyldyǵy men náziktigin aıshyqtady. Ártisterdiń kerbez qımyldary osynaý kópqyrlylyqty jetkizip, bıge rámizdik mán qosty.
Sonymen qatar baǵdarlamada Sultanbek Ǵumardyń kórermen burynnan unatatyn, atap aıtsaq, «turan» ansambliniń óńdeýindegi A.Raıymqulovanyń mýzykasyna dramalyq «Máńgúrt» jáne «HasSak» ansambliniń «Amanat» kompozısııasyna jasaǵan aıbarly «RUH» qoıylymdary usynyldy.
Aıta keteıik, atalǵan baǵdarlama «Astana Operada» jas horeograftardy belsendi qoldap jáne damytyp júrgen balet trýppasynyń kórkemdik jetekshisi Altynaı Asylmuratovanyń bastamasymen iske asyp otyr.