Memleket basshysynyń tapsyrmasyna sáıkes agroónerkásip salasynyń jyl saıynǵy jetkiliksiz qarjylandyrý máselesi sheshildi. Bul týraly Aýyl sharýashylyǵy mınıstrligi málimdedi, dep jazady Egemen.kz.
Resmı aqparatqa súıensek, kóktemgi egis, egin jınaý jumystaryna jáne aýyl sharýashylyq tehnıkasynyń lızıngine qomaqty qarajat bólingen. Alǵash ret jeńildetilgen nesıelendirý kólemi jyldyq 5%-ben 580 mlrd teńgege deıin jetkizildi, al ótken jyldary bul kólem 160 mlrd teńgeden aspady. Qabyldanǵan sharalar fermerlerge barlyq qajetti agrotehnıkalyq sharalardy tolyq kólemde ótkizýge múmkindik berdi. Paıdalanatyn elıtalyq tuqymdardyń úlesi 7,1%-dan 9%-ǵa deıin ósken.
Nátıjesinde 2024 jyly dıqandar sońǵy 13 jylda alǵash ret dándi jáne burshaqty daqyldardan 26,7 mln tonna ónim jınady. О́simdik sharýashylyǵyndaǵy óndiris kólemi 21,1%-ǵa jáne mal sharýashylyǵynda 3,2%-ǵa ósýi aýyl sharýashylyǵynyń jalpy óniminiń 13,7%-ǵa ulǵaıýyna yqpal etip, 8,3 trln teńgeni qurady.
Búginde elimizdiń agroónerkásiptik kesheni 1,1 mln-nan astam adamdy jumyspen qamtamasyz etip keledi. Bul 4 mln-nan astam azamattyń qarjylyq ál-aýqatyna tikeleı áser etedi.
Memleket basshysy sala mamandaryna tapsyrǵan mindetteme sózinde: «Qazaqstannyń strategııalyq maqsaty – Eýrazııa qurlyǵyndaǵy basty agrarlyq ortalyqtyń birine aınalý. Osy maqsatqa qol jetkizemiz desek, eń aldymen, ónimdi joǵary deńgeıde óńdeýge kóshýimiz qajet», degen edi.
Soǵan oraı qaıta óńdelgen aýyl sharýashylyǵy óniminiń úlesin 70%-ǵa jetkizý maqsatynda oryndaý úshin 2028 jylǵa deıin aýyl sharýashylyq ónimin qaıta óńdeýdi damytý jónindegi keshendi jospar bekitildi. Onyń sheńberinde 2024 jyly 279,6 mlrd teńge somaǵa 286 joba paıdalanýǵa berildi. О́simdik maıy men un óndirisin qosa alǵanda, ishki suranysty qanaǵattandyrýǵa ǵana emes, sonymen qatar eksporttyq áleýetti arttyrýǵa múmkindik beredi.