Májilis depýtaty Qaraqat Ábden QR Ishki ister mınıstri Erjan Saparbekulyna depýtattyq saýal joldap, sottalǵan áıelderge amnıstııa jasaý múmkindigin qarastyryp kórýdi usyndy, dep jazady Egemen.kz.
Májilismen usynǵan málimetke sáıkes, búgingi tańda 2336 áıel bas bostandyǵynan aıyrylǵan, olardyń jartysy — analar, onyń ishinde 250-i kóp balaly analar. Al, 1500-den astam bala anasyz qalyp, 100 ge jýyq sábı balalar úıine jiberilgen.
«Sondyqtan Aýyl partııasynyń fraksııasy sottalǵan áıelderdiń jasaǵan qylmysy zorlyq-zombylyq jasaýmen baılanysty bolmasa, qoǵam úshin qaýip tóndirmeıtin bolsa, ondaı áıelderge amnıstııa jasaý múmkindigin qarastyryp kórýdi usynady. Mundaı shara áleýmettik ádildik ornatýǵa, otbasy qundylyǵynyń nyǵaıýyna jáne ómirde qıyn jaǵdaıǵa tap bolǵan áıelderdiń durys jolǵa túsýine jaǵdaı jasaýǵa múmkindik beredi.Kóp jaǵdaıda otbasydaǵy bala tárbıesi áıelderdiń moınynda. Ana alaqannyń aıasy- aq shynardyń saıasy degen sóz bar», dedi Qaraqat Ábden.
Osyǵan oraı, depýtat sottalǵan áıelderge amnıstııany qoldanýǵa qajet tómendegideı krıterııler jobasyn usyndy:
Zorlyq-zombylyqqa qatysy joq qylmysy úshin sottalǵan áıelder; Júkti áıelder men kishkentaı balasy bar áıelder; Kóp balaly áıelder; Alǵash sottalǵan áıelder; Jasy ulǵaıǵan (60-tan asqan) áıelder.Bul rette Qaraqat Ábden aýyr qylmys, asa aýyr qylmys, zorlyq-zombylyqqa baılanysty qylmys jasap, sol úshin sottalǵan, qoǵamǵa qaýip tóndiretin áıelderge amnıstııa jasalmaıtynyn atap ótti. Sondaı-aq, halyqaralyq tájirıbeden jetkilikti mysaldar keltirdi. Máselen, Qyrǵyzstanda áıelderge 1996 jyldan beri 3 ret amnıstııa jasalǵan. Al, О́zbekstanda 2013 jyly amnıstııa jasalyp, áıelder men kámeletke tolmaǵandar bosatyldy. Reseı Prezıdenti 2023 jyly áıelderge amnıstııa jasaý týraly ıdeıany qoldady.
«Jalpy, áıelderge amnıstııa jasalsa, elimizdiń penıtensıarlyq júıesine júkteme azaıady, balalar úılerine túsetin júk tómendeıdi, áleýmettik shıelenis azaıady, memleketimizdiń adam quqyqtary men otbasyny qorǵaý salasyndaǵy halyqaralyq standarttardy ustanatynyn rastaýǵa múmkindik týady. Atalǵan shara otbasylardyń qaýyshýyna, anasynan ajyraýdyń balalarǵa tıgizetin saldaryn azaıtýǵa septigin tıgizip qana qoımaı, qylmystyq saıasatty izgilendirý jolyndaǵy mańyzdy qadamǵa aınalady. Otbasy úshin, qoǵam men memleket úshin bul sheshimniń uzaq merzimdi oń áseri bolmaq. Sondyqtan, áıelderge óz otbasylary men balalaryna oralýyna múmkindik bereıik», dedi Q.Ábden.