«Polymet Solutions Corporation» JShS jylyna 413,7 tonna fýterovka óndiredi. О́nimniń osynaý túri taý-ken-metallýrgııa kesheniniń tehnologııalyq óndirisine paıdalanylady eken. El ǵana emes, tipti Ortalyq Azııa keńistiginde teńdesi joq bul joba óńir ekonomıkasyna serpin berip otyr.
Fýterovka – rezeńkeli-metaldy tósem. Ásirese muny taý-ken baıytý, hımııa ónerkásibi óz qurylǵylaryna qoldanady. Kásiporyn Germanııa, Italııa, AQSh, Japonııa, Ispanııa óndirýshileriniń zamanaýı jabdyqtarymen áleýetin arttyryp, joǵary sapa standarttaryna sáıkes ónim shyǵarady. Sonymen qatar bolat, shoıyn, alıýmınıı, qoladan jasalǵan buıymdar úshin kez kelgen kúrdeliliktegi frezerlik jumystardy atqarady. Byltyr zaýyt Ortalyq Azııadaǵy jalǵyz «Okuma» frezerlik óńdeý ortalyǵyn iske qosty. «Okuma» – metall óńdeýdiń kúrdeli operasııalaryn oryndaýǵa arnalǵan joǵary tehnologııalyq jabdyq. Bul júıe avıasııa, avtomobıl, energetıka jáne mashına jasaý sııaqty ártarapty salanyń suranysyn óteıdi. «Okuma» stanoktary joǵary geometrııalyq dáldik pen «dirildi» azaıtýdy qamtamasyz etip jasalǵan.
Kásiporyn Saryarqa arnaıy ekonomıkalyq aýmaǵynda ornalasqan. Jalpy aýdany 500 gektardan asatyn bul óndiristik alqapta ınvestorlar úshin logıstıkalyq, salyqtyq jáne kedendik jeńildikter qarastyrylǵan. Mundaı múmkindikterdi paıdalaný arqyly «Polymet Solutions Corporation» óz óndirisin keńeıtip qana qoımaı, óńirdiń ekonomıkalyq áleýetin arttyryp otyr.
– Biz ónimniń beriktigi men ómirsheńdigin basty orynǵa qoıamyz. Josparymyzdyń biri – eksporttyq naryqty keńeıtý bolsa, ekinshisi – ónim túrlerin arttyrý. Rezeńke metalmen qosa bıyl shoıyn ónimderin de shyǵarsaq deımiz. Sol sebepti, ekonomıkalyq aýmaqtan qosymsha 10 gektar jer aldyq. Qurylysty jeltoqsan aıynda bastadyq, – deıdi «Polymet Solutions Corporation» JShS bas dırektory Qýandyq Qazanǵapov.
Buqar jyraý aýdanyndaǵy osy óndiris zaýyty bıyldan bastap rezeńke men plastmas buıymdary túrleriniń tizbesin ulǵaıtpaqshy. Kásiporyn qazirdiń ózinde damýdyń jańa satysyna kóterilgen. Munda negizinen ken baıytý fabrıkalaryna qajetti dıirmenderge qaptalatyn rezeńke jabdyqtar óndiriledi. Munsyz dıirmen ataýly jumys istemeıdi. О́nimine eldiń túpkir-túpkirinen suranys joǵary. Ásirese «Kazakhmys», «KAZ Minerals», «Altynalmas», «Kazzinc» sekildi kompanııalar fabrıkasyndaǵy dıirmenderge bul ónim aýadaı qajet. Biregeı ónim Reseıge de eksporttalady. Bıyldan bastap Bolgarııaǵa jóneltiledi degen jospar bar. Qyrǵyzstan, Mońǵolııa memleketterimen tıisti kelissóz júrgizilip jatyr.
Zaýyttyń basty artyqshylyǵy – bilikti mamandar shoǵyry men qýatty tehnologııalyq baza. О́ndiristiń keńeıýi tek ónim kóleminiń ósýimen eseptelmeıdi. Jańa tehnologııalardy kádege jaratý da – mańyzdy mindet. Kompanııanyń bas dırektory Qýandyq Qazanǵapov osylaı deıdi.
О́rken jaıǵan óndiris oshaǵynda 75 adam eńbek etip júr. Jańa seh iske qosylǵan soń taǵy 150 adam jumysqa qabyldanady. Zaýytta eńbek adamyna áleýmettik qoldaý jan-jaqty kórsetilgen. Syıaqysy da bar. Arnaýly tasymaldaý kóligi men tegin túski as qarastyrylǵan. Arǵy jyly da, ótken jyly da úzdik qyzmetkerlerge shetelge saıahatqa joldama berilgen.
«О́nim óndirý úshin shıkizatty negizinen Qytaı, Koreıa, Malaızııa, Vetnam memleketterinen alamyz. Negizgi shıkizat túri – kaýchýk. Kaýchýksiz shıki rezeńke óndirilmeıdi. Hımııalyq shıkizat kórshiles Reseıden tasymaldanady. Qosymsha shıkizat túrleri Eýropa elderinen ákelinedi. Metall buıymdaryna kelsek, negizinen «Hardox» syndy sapaly metall túri Shvesııa elinen tasymaldanady. Zaýyt qyzmetkerleri Stokgolm qalasyna baryp, ondaǵy óndiris oshaqtarymen tikeleı tanysyp qaıtqan. Ol elmen tyǵyz qarym-qatynas ornatylǵan. О́zge kerek-jaraq el ishinen tabylady. Otandyq shıkizat kólemi 70 paıyzdy qurap otyr. Ken baıytý salasynda jańa dıirmender qoldanysqa engizildi. Osyǵan oraı qajetti rezeńke jabdyǵyn der kezinde shyǵarý mańyzǵa ıe», deıdi zaýyttyń óndiris jónindegi dırektory Galına Harasova.
Qaraǵandy oblysy