Búgin, 31 qańtarda Aqtaý qalasynyń apellıasııalyq soty jattyqtyrýshy Alına Serikovanyń ólimine qatysty úkim shyǵardy, dep habarlaıdy Egemen.kz Mańǵystaý oblystyq sotynyń baspasóz qyzmetine silteme jasap.
Marqum qyzdyń ata-anasyna alǵash ret bes aıyptalýshynyń úkimine qatysýǵa ruqsat berildi.
Apellıasııalyq sot is boıynsha basty aıyptalýshyny ómir boıyna bas bostandyǵynan aıyrý týraly úkim shyǵardy. Buǵan deıin birinshi satydaǵy sot ony 20 jylǵa bas bostandyǵynan aıyrǵan bolatyn. Taǵy bir aıyptalýshy 16 jylǵa, qalǵandary 13 jyl 6 aıǵa jáne 13 jylǵa bas bostandyǵynan aıyryldy. Birinshi satydaǵy sot olardy 8,5 jylǵa bas bostandyǵynan aıyrǵan edi.
Jábirlenýshi jaqqa 19 618 415 teńge materıaldyq shyǵyn jáne 30 mıllıon teńge moraldyq shyǵyn óndirildi.
Aıta keteıik, buǵan deıin Aqtaýda bir top er adam qyzdy kólikke kúshtep otyrǵyzyp, zorlyq-zombylyq kórsetip, esirtki qoldanýǵa májbúrlegen. Mundaı qorlyqqa shydamaǵan qyz ótken jyldyń mamyr aıynda óz-ózine qol salǵan.