Qorǵanys mınıstrligi Almatyda «Industrial AI: jańa dáýirge arnalǵan tehnologııalar» uranymen bastalǵan «Digital Almaty 2025» VII Halyqaralyq sıfrlyq forýmynda qorǵanys jáne qaýipsizdik salasyndaǵy zamanaýı sıfrlyq bastamalardy tanystyrdy.
Is-sharada Qorǵanys mınıstriniń orynbasary Darhan Ahmedıev EAEO elderi úkimet basshylarynyń aldynda qorǵanys salasynda jasandy ıntellekti qoldaný týraly baıandama jasady. Forýmda usynylǵan negizgi jobalardyń biri áskerı esepti avtomattandyrýǵa arnalǵan «Srochnık 2.0» júıesi boldy. Bul áskerge shaqyrylǵandarmen jumystyń ashyqtyǵyn arttyrýǵa, jumyldyrý daıyndyǵyn ońtaılandyrýǵa jáne azamattardyń qajetti aqparatqa qol jetkizýin jeńildetýge múmkindik beredi. Júıe derekterdi avtomatty túrde taldaıdy, áskerge shaqyrylýshylardyń sanattaryn anyqtaıdy, SMS habarlamalar jiberedi jáne áskerge shaqyrylýshylardyń qaı ásker túrlerine jiberýge bolatynyn aıtady.
– О́tken jyldardan aıyrmashylyǵy, «Digital Almaty 2025» jasandy ıntellekti qoldanatyn sheshimderge baǵyttalǵan. Osyǵan baılanysty bizdiń baıandamamyz da, usynylǵan stend te qorǵanys salasyndaǵy sıfrlyq ınnovasııalarǵa arnalǵan. Jasandy ıntellekt shaqyrý naýqany men úgit-nasıhat jumystary aıasynda ǵana emes, sonymen qatar áskerı qyzmetshilerdiń kúndelikti ómirin sıfrlyq transformasııalaýda da belsendi qoldanylady. Ol birqatar tapsyrmalardy oryndaýdy jeńildete otyryp, kúndelikti prosesterdi avtomattandyrýǵa kómektesedi, – dedi D.Ahmedıev.
Qorǵanys salasyna ozyq tehnologııalardy engizýge baǵyttalǵan Defence Tech baǵytyn damytýǵa erekshe nazar aýdaryldy. Onyń aıasynda hakatondar, dóńgelek ústelder, strategııalyq sessııalar jáne akselerasııalyq baǵdarlamalar ótkiziledi. 2023 jyly Astana Hub-ta Defense Tech keńsesi ashyldy, al jaqyn arada Almatydaǵy Ofıserler úıinde ókildik ashý josparlanǵan. Bul tehnologııalyq kompanııalardy qorǵanys ınnovasııalaryna belsendi tartýǵa múmkindik beredi.
Buǵan qosa forýmda Qazaqstannyń Qarýly Kúshterine ozyq tehnologııalardy ázirleý men engizýdi qoldaıtyn Defense Tech qorǵanys qaýipsizdigi salasyndaǵy ınnovasııalardy damytý ortalyǵynyń, Damý ınstıtýtynyń stendi tanystyryldy.
Qorǵanys salasyndaǵy sıfrlyq sheshimderdiń damýy Qorǵanys mınıstrliginiń jańa sıfrlyq dáýirde eldiń qaýipsizdigi men qorǵanys qabiletin joǵary deńgeıde qamtamasyz ete otyryp, ozyq tehnologııalardy engizýge degen umtylysyn kórsetedi.