H.Dosmuhamedov atyndaǵy Atyraý ýnıversıtetinen chellendjge ulttyq úlgide kıingen 200-ge jýyq oqytýshy-professor jáne 1 000 stýdent qatysty, dep jazady Egemen.kz.
Qasym-Jomart Toqaev qasıetti Saraıshyqta ótken Ulttyq quryltaıdyń úshinshi otyrysyndaǵy sóılegen sózinde: «Basqa jurt qazaqty kıiminen tanıtyn bolýy kerek. Keıbir iri kompanııalar men oqý oryndary ulttyq naqyshta kıiný úrdisin engizip jatyr. Bul – óte oryndy bastama, ony qoldap, aýqymyn keńeıte túsken jón», degen edi.
85 jyldyq tarıhy bar Atyraý ýnıversıteti sońǵy jyldary aptanyń árbir juma kúninde ulttyq kıim kııýdi daǵdyǵa aınaldyrǵan.
«Ýnıversıtetimizde ulttyq naqyshtaǵy kıimderdi kııý trendke aınalyp kele jatyr. Qazaqtyń ulttyq kıimi men áshekeı buıymdarynda tól mádenıetimiz ben tarıhymyz, salt-dástúrimizdiń ǵasyrlar tezinen ótken izi bar. Bul – urpaqtan urpaqqa jetken ulttyq bolmysymyz. Ulttyq kıimdi ulyqtaý maqsatynda elimizdegi joǵary oqý oryndaryna osy chellendjdi joldaımyz. Jastar sáni men saltanaty kelisken kıimdi kıip, onyń rýhanı mańyzyn, ulttyq ereksheligin pash etip jatyr. Qazaqy oıý-órnekpen kómkerilgen ulttyq kıim kúndelikti ómirde sánge aınalǵany jón dep bilemin», dedi ýnıversıtettiń basqarma tóraǵasy-rektor Salamat Idrısov.
Aıta ketsek, oqytýshy-professorlar men bilim alýshylar atalǵan chellendjben ǵana shektelmeı, ulttyq sport túrlerinen, atap aıtqanda, toǵyz qumalaq, asyq atý, láńgi tebý, arqan tartý, bes tas oınaý, kirtasyn kóterý, qol kúres sııaqty oıyndar boıynsha «Jaıyq» sport kesheninde ózara saıysty.
Atalǵan izgi chellendj S.Amanjolov atyndaǵy Shyǵys Qazaqstan, M.О́temisov atyndaǵy Batys Qazaqstan, M.Áýezov atyndaǵy Ońtústik Qazaqstan ýnıversıtetterine jáne M.Qozybaev atyndaǵy Soltústik Qazaqstan memlekettik ýnıversıteti men E.Bóketov atyndaǵy Qaraǵandy ýnıversıtetiniń oqytýshy-professorlary men stýdentterine, Atyraý oblysynyń barlyq memlekettik qyzmetkeri jáne bilim basqarmasyna qarasty kolledjder men mektep ujymdaryna joldandy.