Qostanaı qalasynyń turǵyny Asqar Toıǵanovtyń úıinde osydan 300 jyl buryn qashalǵan qobyz saqtaýly tur. Boıynda birneshe ǵasyrdyń úni tunyp jatqan qyl qobyz qaraǵaıdan bútindeı shabylyp jasalǵan. Moıny men shanaǵy tutasqan tusy men basy jez taspamen qaptalǵan.
Bertinde jergilikti qolóner sheberi Muhamedqalı Rahalıevtiń qolynan ótken qobyzdyń bet terisi qaıta qaptalyp, basyna «Nurpeıis (Toıǵan) atadan qalǵan qobyz. Muragerlerge amanat. HVIII ǵ.» degen jazý japsyrylypty.
Kóne aspapty óńirde dástúrli ónerdi nasıhattap júrgen ánshi, qobyzshy Qydyrbek Qıyshanuly ustap kórgen eken: «Eki qulaǵy qajala-qajala juqaryp qalǵandyqtan, ońaılyqpen kúıge kele qoımady. Ysqysy tozǵan. Tıegin juqartý kerek, ol kádimgi faneradan jasalypty. Áý basta ol da aǵashtan jonylǵan bolý kerek. Tıegi neǵurlym juqa bolsa, aspaptyń úni de zoraıyp shyǵady. Aspapty ustaǵannan-aq denem titirkenip sala berdi. Áldebir sıqyr qobyzdy zarlatýǵa yryq bermedi de, úni shyqpaı qoıdy. Buǵan deıin Naýyrzym aýdanynyń Mereke aýlyndaǵy Jetibaı áýlıeniń qobyzyn shalǵan kezde, kerisinshe, jeńildep qalyp edim, mynaý zildi bolyp shyqty. Degenmen aspapty áli de biraz sóıletý kerek», deıdi ónerpaz.
Ǵasyrlar qoınaýynan jetken eski qobyzdyń ıesi kezinde el arasynda Toıǵan baqsy atanyp ketken Nurpeıis Jylgeldiuly eken. Ol kisi jaıly derek joqtyń qasy. Belgilisi, Toıǵan baqsynyń ákesi Jylgeldi HVIII ǵasyrdyń basynda Áıet ózeniniń boıyna Syr óńirinen qonys aýdaryp kelgen.
«Bul qobyzdy Jylgeldi atamyz sol Syr elinen alyp kelipti. Soǵan qaraǵanda, aspaptyń tarıhy úsh ǵasyrdan asyp ketedi. Nurpeıis atamyz kıeli aspaptyń kómegimen óz zamanynda jurtty túrli aýrý-syrqattan emdegen. Ol kisi qobyz, qylysh, qamshy ustapty. Osy úsheýimen adam emdegen. Qobyz bizdiń áýletimizde, qamshy jamaǵaıyn týystarda, al qylyshtyń qaıda ekeni belgisiz. Naǵashylarymyz osy qalada turady. Ol úıden qamshyny kórdik, biraq naǵashylarym babamnyń dúnıesin qaıtaryp bergisi joq. Toıǵan baqsy kezinde ataqty Maral ıshanǵa shákirt bolyp, batasyn alǵan eken. Sol kezdegi Ordabaı qonysy, qazirgi Qostanaıǵa juma namazyna qatysyp, Maral ıshanmen ıyq tirestirip sapta turý úshin sonaý 130 shaqyrym jerden jaıaý-jalpy kelgen kezi de bolypty. Sonaý Shıli aýlynan Qostanaıǵa jetýdiń ózi qazir de ońaı emes», deıdi baqsynyń urpaǵy Asqar Toıǵanov.
Qostanaı oblysy