Elordada Beıjiń deklarasııasynyń 30 jyldyǵyna jáne BUU Qaýipsizdik Keńesiniń «Áıelder. Beıbitshilik. Qaýipsizdik» 1325-qaýlysynyń 25 jyldyǵyna arnalǵan joǵary deńgeıdegi halyqaralyq kezdesý ótti. Bul –áıelderdiń quqyqtaryn keńeıtýge jáne genderlik teńdikti qamtamasyz etýge baǵyttalǵan negizgi qujattar, dep habarlaıdy Egemen.kz Mádenıet jáne aqparat mınıstrliginiń baspasóz qyzmetine silteme jasap.
Kezdesýge Ortalyq Azııa elderiniń memlekettik organdary basshylary, QR Parlamenti Májilisi tóraǵasynyń orynbasary Danııa Espaeva, Konstıtýsııalyq sot tóraǵasy Elvıra Ázimova, Eýropa jáne Ortalyq Azııa elderi boıynsha «BUU-áıelder» keńsesiniń óńirlik dırektory Belen Sans Lýke jáne azamattyq qoǵam ókilderi qatysty.
Kezdesýde QR Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraǵasy Aıda Balaeva sóz sóılep, Qazaqstannyń 1995 jyly Beıjiń deklarasııasyna qosylǵan sátten bastap, ulttyq jáne halyqaralyq basymdyqtardy ushtastyryp, turaqty genderlik saıasat qalyptastyrý baǵytyn berik ustanǵanyn atap ótti.
«Bul prosess eń aldymen naqty qurylǵan ınstıtýsıonal tetikterdiń júıesine negizdeledi. 2022 jyly Prezıdent Qasym-Jomart Toqaevtyń bastamasymen júzege asqan aýqymdy konstıtýsııalyq reforma Konstıtýsııalyq sotty qaıta qalpyna keltirip, Adam quqyqtary jónindegi ýákil ınstıtýtyn bekitti. Men bul ózgeristerdiń mańyzyn erekshe atap ótkim keledi, óıtkeni quqyq qorǵaý ınstıtýttarynyń kúsheıýi genderlik teńdikti ilgeriletip, qorǵaý úshin senimdi jaǵdaı jasaıdy», dedi Aıda Balaeva.
Osy maqsatta elimizde Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa jumys isteıdi. Sonymen qatar, Memleket basshysynyń Jarlyǵymen 2023 jyly óńir basshylary janynan genderlik máseleler jónindegi keńesshi ınstıtýty quryldy. Al eldegi genderlik saıasatty qalyptastyrý jáne júzege asyrýǵa jaýapty negizgi memlekettik organ – Mádenıet jáne aqparat mınıstrligi. Mınıstrlik quramynda arnaıy komıtet bar.
Eýropa jáne Ortalyq Azııa elderi boıynsha «BUU-áıelder» keńsesiniń óńirlik dırektory Belen Sans Lýke Qazaqstan men Ortalyq Azııa elderiniń genderlik saıasatyn joǵary baǵa berdi. Ol oń ózgeristi atap ótip, Beıjiń deklarasııasynyń maqsattary álemde tolyq júzege asatynyna senim bildirdi.
«Eldegi áıelder men qyz balalardyń quqyǵyn keńeıtý boıynsha qol jetkizgen jetistikterińiz úshin qýanyshtymyn. Biz barlyq áıelder men qyz balalardyń erkin, múmkindikteri men quqyqtarynyń bar bolýy úshin kúsh salamyz. Úkimetaralyq deńgeıde kelisilgen ýaǵdalastyqtar aıasynda jetken jetistikterińizdi joǵary baǵalaımyz», dedi Belen Sans Lýke.
Esterińizge sala keteıik, Beıjiń deklarasııasy 1995 jyly Áıelder jaǵdaıy jónindegi tórtinshi Dúnıejúzilik konferensııada qabyldandy. Qujatta áıelder men qyz balalardyń quqyqtaryn keńeıtý boıynsha 12 negizgi salada strategııalyq is-qımyldar belgilengen. «Áıelder. Beıbitshilik. Qaýipsizdik» 1325-qaýlysy 2000 jyly qabyldanyp, áıelderdiń beıbitshilik pen qaýipsizdik máselesine qatysty tıimdi sheshimder qabyldaýyn qamtamasyz etýge baǵyttalǵan.