QR Aýyl sharýashylyǵy mınıstrliginiń Qostanaı oblysy boıynsha jer resýrstaryn basqarý basqarmasy Jitiqara aýdanynyń prokýratýrasymen jáne Ishki ister organdarymen birlesip, jaıylymǵa arnalǵan jer teliminde zańsyz altyn óndirý faktileriniń jolyn kesti, dep habarlaıdy Egemen.kz.
Tekseris barysynda jaýapkershiligi shekteýli seriktestiktiń aýyl sharýashylyǵy ónimderin óndirýge arnalǵan jer ýchaskesin ıelengeni anyqtalǵan. Alaıda jer ıesi is júzinde topyraqty jýý ádisi arqyly zańsyz baǵaly metaldar óndirýmen aınalysqan.
Aýmaqty tekserý barysynda arnaıy tehnıka, metall izdegishter men paıdaly qazbalardy zańsyz óndirýge arnalǵan basqa da quraldar tabylǵan.
«Sonymen qatar, topyraqtyń qunarly qabatynyń buzylýy faktisi tirkeldi. Departament 2,6 mıllıon teńge aıyppul saldy. Sondaı-aq seriktestik zańsyz áreketterdiń saldarynan búlingen qunarly topyraq qabatyn qalpyna keltirýge mindetti», dep habarlady Aýyl sharýashylyǵy mınıstrliginiń baspasóz qyzmeti.