Almatylyq «Qaırat» fýtbol klýbynyń 16 jastaǵy fýtbolshysy Dastan Sátbaev Londonnyń «Chelsı» klýbymen kelisimshartqa otyrdy, dep habarlaıdy Egemen.kz.
Jas fýtbolshy kámelettik jasqa tolǵan soń, 2026 jyldyń jazynda resmı túrde aǵylshyn klýbyna aýysady. Oǵan deıin Dastan Sátbaev «Qaırat» sapynda óner kórsete beredi.
Dastan Almaty qalasynda dúnıege kelgen, segiz jasynda «Qaırat» akademııasyna túsip, oqýdyń barlyq satysynan ótken. Alǵashqy kúnnen bastap eńbekqorlyǵymen, tártibimen, kemeldikke umtylýymen kózge túsken.
«Qaırat» fýtbol klýbynyń málimeti boıynsha, Dastan Sátbaev QJ lıgasynda eki maýsymda 28 match ótkizip, 26 gol soǵyp, 10 nátıjeli pas bergen. Ol 2024 jylǵy maýsymdaǵy QJ lıgasynyń eń úzdik oıynshysy atandy.
«Dastandy mansabyndaǵy eń mańyzdy qadamymen quttyqtaımyz! Biz onyń jetistikterin maqtan tutamyz jáne ony alda jańa bıikter kútip turǵanyna senimdimiz!», dedi «Qaırat» fýtbol klýbynyń baspasóz qyzmeti.