Qazaqstan Respýblıkasy Ishki ister mınıstrligi Mekke men Medınaǵa, sondaı-aq álemniń basqa elderine saıahattaýdy josparlaǵan azamattarǵa alaıaq kompanııalardyń aılasyna túspeý úshin saqtyq sharalaryn eskerýdi usyndy, dep habarlaıdy Egemen.kz.
«Fırmanyń lısenzııasyn jáne ol týraly pikirlerdi tekserińiz. Mundaı saparlardy uıymdastyratyn resmı týrıstik kompanııalardyń memlekettik lısenzııasy bolýy qajet. Klıentterdiń pikirlerin muqııat zertteńiz. Týroperatorlar ár týrıstke arnaıy týrkod usynýy tıis. Tym tómen baǵaǵa qyzyǵyp, alaıaqtardyń qurbany bolmańyz. Eger usynys kúmán týdyrsa, asyǵys sheshim qabyldamańyz. Týrıstik fırmalardyń baǵalaryn salystyryp, naryqtyq deńgeıge sáıkestigin anyqtaǵan jón», – delingen IIM taratqan habarlamada.
Alaıaqtardyń arbaýyna túspeý úshin kelesi saqtyq sharalaryn ustaný qajet:
Qujattar men kelisimshartty tekserińiz;
Barlyq kelisimshartty muqııat oqyp shyǵyńyz. Eger bir nárse túsiniksiz bolsa, mamanmen keńesińiz;
Baılanys derekterine nazar aýdaryńyz;
Senimdi týrfırmanyń naqty mekenjaıy, baılanys telefony jáne elektrondy poshtasy bolady. Alaıaqtar kóbine baılanys derekterin jasyryn ustaýy múmkin;
Týr baǵdarlamasyn muqııat zerdeleńiz;
Usynylǵan qyzmetterdiń tolyq tizimin qarap shyǵyńyz (ushý, turǵyn úı, kólik, tamaqtaný, medısınalyq saqtandyrý jáne t.b.);
Qosymsha tólemderden saq bolyńyz. Týr baǵasyna barlyq qajetti shyǵyndar kiretinine kóz jetkizińiz.
IIM azamattarǵa tek resmı tirkelgen týroperatorlardyń qyzmetine júginýge jáne kúmándi usynystarǵa senbeýge keńes beredi.