Túrkistan oblysy boıynsha Memlekettik kirister departamenti basshylyǵy, qalalyq basqarma mamandary saýda salasyndaǵy kásipkerlermen kezdesý ótkizip, salyq zańdylyǵyn jan-jaqty mysaldarmen túsindirgen edi, dep jazady Egemen.kz.
Mine sol salyq tóleýshilermen qatar aqsaqal-ardagerler, ımam-moldalar da qatysqan jıynda oblystyq Aqsaqaldar alqasynyń tóraǵasy Jarylqasyn Áziretbergenuly saýda oryndarynyń basshylaryn alkagol ónimderin satpaýǵa shaqyrdy.
«Búgin ózderińizben aqyldasýǵa, keńeskeli kelgen Aqsaqaldar alqasy 2021 jyldan beri óńirimizdi araq-sharaptan ada oblysqa, Túrkistan qalasyn shyn mánindegi rýhanı astanaǵa aınaldyraıyq dep úndeý jarııalap keledi. Nájıjesinde Túrkistan oblysynda 51 aýyl araq-sharap satýdy toqtatty. Dúkenderinde satpaıdy, qudalyq, toı, basqa da qýanyshty jıyndaryn alkagolsiz ótkizedi. Bir Saýran aýdanynyń ózinde 10 aýyl araqtan ada aýylǵa aınaldy. Mundaı eldi mekenderdiń qatary kóbeıetinine senimimiz mol. Al, Túrkistan qalasynda 12 sýpermarket, dúkender araq-sharap satýdy toqtatty. Degenmen oblys ortalyǵynda áli de araq-sharap satatyn sýpermarketter, dúkender, saýda ortalyqtary jeterlik. Biraq, olardyń satýǵa ruqsaty – lısenzııasy bar, zań qorǵaıdy. Alaıda, statıstıkaǵa súıensek, elimizde qylmys túrleriniń 90 paıyzǵa jýyǵy alkagol ónimderin tutyný saldarynan oryn alady. Iаǵnı, adam óltirýge deıingi aýyr qylmystarǵa satýshylar da sebepker bolady degen sóz. Oǵan keltiretin mysaldar da jetkilikti. Sondyqtan, shańyraǵymyzdyń shyrqyn buzatyn, qoǵamda qylmys jasaýǵa ıtermeleıtin osyndaı keleńsizdikterdi boldyrmaý maqsatynda biz oblys, qala ımamdarymen, aqsaqaldarmen aqyldasyp, jastarmen de keńesip júrgen jaıymyz bar. Solaı kóptiń qoldaýymen, suraýymen aralaryńyzdaǵy lısenzııasy bar saýda oryndarynyń ıelerin spırttik ishkilikter satpaýǵa shaqyramyz», dedi Jarylqasyn Áziretbergenuly.
Aıta keteıik, Túrkistan qalasy boıynsha memlekettik kirister basqarmasynyń mamandary oblys ortalyǵynda jyl basynan beri zańsyz alkogol ónimderine qarsy saýda oryndaryna 5 reıdtik tekserý sharasyn júrgizgen. Nátıjesinde 40 kásipkerge shara kórilip, 33 salyq tóleýshiden lısenzııasyz spırttik ishkilikterdi satylymǵa shyǵarǵany úshin 7379 shólmek tárkilegen. Jalpy jıyntyǵy 6163 lıtr, quny 8 mln 443 myń 515 teńgeni quraıtyn alkogol ónimderi túgel sot oryndaýshymen joıylypty.