Bas prokýror Prezıdentke elimizdegi zań ústemdiginiń jaı-kúıi jáne qadaǵalaý organdarynyń basym baǵyttary boıynsha atqarǵan jumys qorytyndylary týraly baıandady, dep jazady Egemen.kz.
Qasym-Jomart Toqaevqa krımınogendik jaǵdaı jáne qylmystyq-quqyqtyq saladaǵy azamattardyń konstıtýsııalyq qaqyn qamtamasyz etýge baǵyttalǵan sharalar jóninde esep berildi. Prokýratýra organdary sotqa deıingi tergeý satysynda 32 myńnan astam zańsyz sheshimdi toqtatty, bul ister Qylmystyq-prosestik kodekske saı kelmeıdi. 4 myń azamattyń qylmystyq iske negizsiz tartylýyna jol bermedi. Sonymen qatar zańsyz ustalǵan 1,5 myńnan asa adam bosatyldy. Bas prokýrordyń qarsylyǵy negizinde Joǵarǵy sot 150 tulǵaǵa qatysty istiń mán-jaıyn oń baǵytqa ózgertip, sonyń ishinde 10 adam tolyq aqtaldy.
Berik Asylovtyń habarlaýynsha, áleýmettik-ekonomıkalyq salada 81 myń kásipkerdiń, 979 myń zeınetkerdiń, halyqtyń áleýmettik turǵydan az qamtylǵan toptarynyń jáne basqa da azamattardyń buzylǵan quqyqtary qalpyna keltirilgen. 123 myń jumysshynyń eńbek quqyǵyn buzýǵa jol berilmegen. Jalpy somasy 4,5 mıllıard teńge bolatyn alıment boıynsha qaryz óndirilgen.
Prezıdentke byltyr memleket paıdasyna 627 mıllıard teńgeden asatyn ótemaqy qaıtarylǵany jóninde aıtyldy.
Ekonomıkaǵa 12 trıllıon teńgeden astam qarjy quıǵan 800 ınvestorǵa prokýrorlyq kómek berildi. Prokýratýra aktisi boıynsha 136 laýazymdy tulǵa jaýapqa tartyldy. Prokýrorlar ınvestorlarǵa qatysty memlekettik organdardyń 712 sheshimine kelisim bermedi. Investısııalyq jobalarǵa qoldaý kórsetý barysynda «prokýrorlyq súzgini» paıdalaný óz tıimdiligin kórsetti. Jalpyulttyq pýlǵa engen jobalardyń júzege asyrylýyn qadaǵalaýǵa múmkindik beretin Sıfrly ınvestısııalyq platforma belsendi qyzmet atqaryp keledi.
Memleket basshysyna qoǵam nazaryn aýdarǵan birqatar qylmystyq isti tergeý barysy jóninde málimet berildi.
Bas prokýror qylmysqa qarsy kúreste sıfrlyq tehnologııalardy jappaı engizý jóninde baıandady. Atap aıtqanda, izdeýde júrgen azamattardy «aqyldy» beınekameranyń kómegimen tabý (izdeýde júrgender sany 9,4 paıyzǵa azaıdy) tásili jolǵa qoıyldy.
Qasym-Jomart Toqaev «Zań jáne tártip» qaǵıdasyn iske asyrý, barlyq salada zańnamanyń saqtalýyn qamtamasyz etý jumystaryn jalǵastyrýdy tapsyrdy. Sondaı-aq alaıaqtyqqa qarsy is-qımyl, esirtki bıznesimen kúres, qoǵamdyq oryndarda quqyqbuzýshylyqtyń aldyn alý boıynsha quqyq qorǵaý men basqa da memlekettik organdardyń qyzmetin úılestirýdiń mańyzyn atap ótti.