«Qazaqmys» korporasııasy jeti kenshi qaza tapqan apat ornynda opyrylýdyń bolmaǵanyn málimdedi, dep habarlaıdy Egemen.kz.
Esterińizge sala keteıik, Ulytaý oblysyndaǵy «Jomart» kenishindegi qaıǵyly oqıǵaǵa taý jynysynyń opyrylýy sebep bolǵany aıtylǵan edi.
«Alǵashqy nusqada qaıǵyly oqıǵaǵa taý jynysynyń opyrylýy sebep bolǵany aıtyldy. Alaıda apattan qutqarý toby opyrylýdyń bolmaǵanyn anyqtady. Kenishtegi jumys tergeý aıaqtalǵanǵa deıin toqtatyldy. Tabıǵı gazdyń jarylýyna ne sebep bolǵany taldanyp jatyr. Kompanııa Úkimettik komıssııamen jáne tergeý organdarymen qoıan-qoltyq jumys isteýde jáne qoldanystaǵy qaýipsizdik standarttaryna túzetý engizýdi josparlap otyr», delingen habarlamada.
Sonymen qatar qaıǵyly oqıǵaǵa baılanysty «Qazaqmys» kompanııasy qaza tapqan jumyskerlerdiń otbasyn qoldaý úshin shuǵyl áreket etip, naqty shara qabyldady. Is barysynda ishki shtab qurylyp, ótemaqy tóleý, máıitterdi tasymaldaý, nesıe boıynsha mindettemelerdi oryndaý jáne otbasy múshelerin jumyspen qamtý máseleleri nazarǵa alyndy.
Kompanııa basshylyǵy qaza tapqan kenshilerdiń úılerine baryp, otbasyna kóńil aıtty. Sondaı-aq, elimizdiń túrli óńirlerine máıitterdi jetkizý shyǵynyn óz moınyna aldy. Jaqyn týystarynyń ótinishi boıynsha úsh kenshiniń máıiti Túrkistan, Qaraǵandy oblystaryna, qalǵandary Jezqazǵan, Sátbaev qalalaryna jetkizilgen.