Memleket basshysy Ulytaý oblysyndaǵy «Qazaqmys» korporasııasyna qarasty kenishte oryn alǵan qaıǵyly oqıǵaǵa baılanysty eńbek qaýipsizdigi salasynda qatań saqtalýǵa tıis jaǵdaılarǵa nazar aýdardy, dep habarlaıdy Egemen.kz Aqordanyń baspasóz qyzmetine silteme jasap.
«Bekitilgen talaptardyń óreskel buzylǵan faktileri bar. Nysandardyń ónerkásiptik qaýipsizdik júıesimen jabdyqtalý deńgeıi óte tómen. Kompanııalar eńbek qaýipsizdigin qamtamasyz etýge baǵyttalǵan jobalarǵa tıisti mólsherde ınvestısııa salmaıdy. Munyń barlyǵy tehnogendi apattarǵa, jumysshylardyń qaza tabýy men jaraqat alýyna ákep soqtyrady», delingen habarlamada.
Prezıdent qaterli óndiris oryndarynda jumys isteıtin azamattardyń qaýipsizdigin qamtamasyz etý boıynsha Úkimetke tómendegideı sharalardy qabyldaýdy tapsyrdy:
1. Nysandarda ónerkásiptik qaýipsizdik normalarynyń saqtalýyna qatysty tekserý júrgizý;2. Atalǵan nysandarǵa zamanaýı qaýipsizdik júıesin, sonyń ishinde gaz belgi berý qurylǵylaryn, seısmıkalyq qondyrǵylaryn, pozısıonırleý júıesin jáne taǵy basqa tıisti ádis-tásilderdi ázirleý men engizý;3. Boljaý men qulaqtandyrýdyń avtomattandyrylǵan júıesin engize otyryp, nysandardy sıfrlandyrý;4. Tekserý qorytyndysy boıynsha jer qoınaýyn paıdalanýshylardyń jumys baǵdarlamalaryna túzetýler engizip, zamanaýı ónerkásiptik qaýipsizdik júıesine salynatyn ınvestısııa kólemin ulǵaıtý jolyn qarastyrý;5. О́nerkásiptik qaýipsizdik salasyndaǵy baqylaý men qadaǵalaý tetikterin qatańdatý.Memleket basshysynyń bul tapsyrmalaryn Prezıdent Ákimshiligi erekshe baqylaýda ustaıdy.