1989 jyly belgili jazýshy Qoǵabaı Sársekeev erdiń jasy – elýin týǵan jerinde toılady. Sol joly qarymdy qalamger kindik qany tamǵan bizdiń aýylǵa da at basyn burdy. Qoǵabaı aǵa Alakóldiń irgesindegi «Qoǵada» týǵan. Keńshar taraǵanǵa deıin munda eki-úsh shopannyń otbasy qystap otyratyn. Tabıǵaty sondaı kórkem. Aınalasy qalyń qopa. Malǵa yq. Ásirese bul qystaq kóktemde aıryqsha qulpyrady. Neshe túrli qustar kelip, qopaǵa uıa salady. Biz solardyń jumyrtqasyn alyp jeımiz. Negizi, sýretkerdiń atamekeni, ósken ortasy – Kókalat aýyly. Kórshi eldi meken. Onyń ata-anasy balasy ómirge keletin jyly bizdiń aýylǵa kóship kelgen eken. Bul oqıǵa týraly avtor ómirbaıandyq esteliginde ashyp jazǵan.
Aýyl klýbynda ótken jazýshynyń mereıtoıyna arnalǵan ádebı keshke barlyq jurt jınaldy. Beınelep aıtqanda, ıne shanshar oryn bolmady. Soǵan muǵalimimiz tórtinshi synypta oqıtyn bizdi de alyp bardy. Mundaı jıyndy alǵash kórgenimiz. Tik turyp tamashaladyq. Bir kezde shymyldyq túrildi. Sahna tórine alystan at terletip kelgen syıly qonaqtar jaıǵasty. Qoǵabaı aǵamen birge Almatydan kim erip kelgenin bilmeımin. Esimde joq. Biraq Arqalyqtan qosylǵan belgili satırık Seıit Kenjeahmetov aǵany tanydym. Onyń ázilmen árlep, qaljyńmen qaǵytyp sóılegen sózi eldi kúlkige qarq qyldy.
Osy kezdesý maǵan keremet unady. Jerles jazýshyny jaqynnan kórip, erekshe áser aldym. Sóıtip, meniń bala qııalymda Qoǵabaı aǵa sekildi tanymal tulǵa bolsam degen arman búrshik jardy. Ádebı shyǵarmaǵa qumarlyǵym artty. Kórkemsóz sheberiniń «Kilt», «Qarasha qazdar» atty kitaptaryn izdep oqydym. Ásirese «Aldan» áńgimesindegi bas keıipkerden avtordyń bala beınesin tanydym. Sondaı-aq halyq batyry Amangeldi Imanovtyń balalyq shaǵyn «Qyzyl jalaý» atty romanynda aıshyqty kestelegen. Keıin bul týyndy tolyqtyrylyp, «Zamanaqyr» ataýymen qaıta basyldy.
Altynshy synyptan bastap jasyryp óleń jazdym. Alǵashqy óleńim mekteptegi qabyrǵa gazetinde jarııalandy. Sol kúni qýanyshym qoınyma syımady. Odan keıin aýdandyq basylymda jaryq kórdi. Mektep ómirinen jazylǵan shaǵyn habarlarym shyqty.
Joǵary synypta Almatydaǵy Qazaq ulttyq ýnıversıtetine oqýǵa túsýdi armandadym. Osyny anam men apalaryma aqyryndap aıtyp edim, olar qarsy boldy. Meni alysqa jibergileri kelmedi. Buǵan unjyrǵam túsip, meselim qaıtyp qalǵandaı kúı keshtim. Alaıda Alataýdyń etegindegi ásem qalaǵa baryp oqý oıymnan ketpeı qoıdy. Bir kúni «Zamanaqyr» kitabynan qalamgerdiń mekenjaıyn alyp, hat jazdym.
«Qadirli Qoǵabaı aǵa!
Men sizge týǵan aýylyńyzdan hat jazyp otyrǵan balańyzbyn. Esimim – Azamat. Sizdiń barlyq shyǵarmańyzdy oqydym. Maǵan erekshe unady. Meniń de siz sekildi jýrnalıst-jazýshy bolǵym keledi. О́leńderim men maqalalarym mekteptegi qabyrǵa gazeti men aýdandyq basylymda jarııalanyp júr. Bıyl 10-synypta oqımyn. Kelesi jyly 11-synypqa kóship, mektep bitiremin. Bir armanym bar. Ol – Almatydaǵy Qazaq ulttyq ýnıversıtetiniń jýrnalıstıka fakýltetine oqýǵa túsý. Sonyń jolyn aıtyp, kómektese alasyz ba?» dep konvertke salyp, poshtamen jiberdim.
Hat qolyna tıdi me, tımedi me, bilmeımin. Bir kezdeskende Qoǵabaı aǵanyń ózinen suraımyn dep oıladym. Alaıda jazýshymen jolyǵa almadym. Taǵdyr jazbady. Biraq qalamgerge uqsasam degen armanym meni jýrnalıstıkaǵa alyp keldi.