Atyraýda bir otbasynyń 5 balasy beıimdeý ortalyǵyna, 3 balasy sábıler úıine ornalastyryldy, dep habarlaıdy Egemen.kz.
Bala quqyqtary jónindegi Atyraý óńirlik ýákili Aıjan Sársembaevanyń aıtýynsha, 8 balasy bar otbasynyń úıi turýǵa jaramsyz bolǵan.
«Bul otbasyǵa 2020 jyly «Hareket» qaıyrymdylyq qory arqyly jeke úı berilgen. Alaıda turǵyn úıdiń jaǵdaıy óte nashar. Úıdiń tóbesinen sý ketip, jylý da bolmaǵan. Sonyń saldarynan kópbalaly ananyń áleýmettik jaǵdaıy Atyraý qalalyq ákimdigi janyndaǵy kámeletke tolmaǵandar isteri jónindegi komıssııada qaraldy. Ananyń ótinishine sáıkes komıssııa sheshimimen 5 balasy Atyraý oblystyq kámeletke tolmaǵandardy beıimdeý ortalyǵyna, al 3 balasy «Sábıler úıine» ýaqytsha ornalastyryldy», deıdi Aıjan Sársembaeva.
Onyń aıtýyna qaraǵanda, kópbalaly ananyń úıine jóndeý júrgizilip jatyr. Qazir jeke turǵyn úıdegi jylý júıesi qalpyna keltirilgen.