Qalyń eli qaharmanyn eske aldy

Batyrdy eske alý rásimi Shym­kent qalasynyń Jeńis saıaba­ǵyn­daǵy generaldyń eskertkishine gúl shoq­taryn qoıýdan bastaldy. Oǵan áskerı kolledj shákirt­­teri, otstavkadaǵy polkovnık Serik­baı Onbaev bastaǵan ardager uıym­darynyń ókilderi, ­za­pas­­taǵy general-maıor Bolat Jora­­baev basqaratyn áskerı-teh­­nı­kalyq mektep oqýshylary qa­tysty.

Áskerı kolledj bastyǵy, polkovnık Maqsat Aqshalov Sabyr Rahymovtyń erekshe eńbegin eske alyp ótti. Ol qol­bas­shynyń jeńiske qosqan úlesi men jastar arasynda batyr týraly estelikti saqtaýdyń mańyzyna toqtaldy. Áskerı kolledj tuńǵysh qazaq generalynyń esimin ıelengen jalǵyz oqý orny emes ekenin, onyń qurmetine talaı eskertkish turǵyzylǵanyn, búginde batyr esimimen atalatyn kósheler men ártúrli bilim mekemeleri elimizde kóp ekenin tilge tıek etti.

О́z kezeginde áskerı mekteptiń túlegi, zapastaǵy general-maıor Bolat Jorabaev oqýshylar aldynda sóz sóılep, óziniń áskerı sala­daǵy joly men urpaqtar sabaq­­tastyǵynyń mańyzdy róli jaıynda oı tolǵady. Is-shara sońyn­da áskerı-tehnıkalyq mek­tep­tiń kýrsanttary men oqý­shy­lary gúl shoqtarymen batyr rýhyna taǵzym etip, eskert­kishtiń aldy­nan saltanatty sherýmen júrip ótti.

Sol kúngi merekelik jıyn Sabyr Rahymovtyń týǵan jeri Túrkistan oblysy Qazyǵurt aýdany Kókibeli aýylynda jalǵasyn tapty. Qolbasshy esimimen atalatyn orta mekteptiń akt zalynda kolledj tárbıelenýshileri gene­raldyń ómir jolyna ar­nal­ǵan ádebı-mýzykalyq kesh uıym­das­tyrdy. Konserttik baǵ­dar­­lama barysynda kýrsanttar áskerı-patrıottyq ánder shyr­qap, ózde­riniń jeke shyǵarma­shy­­lyq­ta­rynan óleńder oqyp, Sabyr Rahy­movtyń jaýyngerlik joly­nyń umytylmas sátterin beı­­ne­legen sahnalyq qoıylym kórsetti.

Endeshe, qazaqtyń batyr uly­­­nyń qysqasha ómir jolynan derek keltirsek, Sabyr Omar­uly Rahymov – áıgili áske­­rı qol­basshy, qazaq halqy men Orta­lyq Azııadan shyqqan tuń­ǵysh general. 1902 jyly búgingi Túrkistan oblysyna qaraıtyn Qazyǵurt aýdanynyń Kókibeli aýylynda dúnıege kelgen. 1922 jyly Bakýdegi áskerı mektepke túsip, Túrkistan áskerı okrý­gin­de alǵashqy qyzmetin basta­ǵan. Basmashylarmen bol­ǵan shaı­qastardaǵy erligi úshin «Qyzyl Juldyz» ordenimen mara­­pat­­­talǵan. 1941 jyly Ekin­shi dúnıejúzilik soǵys bas­talǵan tusta maıdanǵa attanyp, mo­to­­­­at­qyshtar bólimderin bas­qar­­ǵan, Belorýs­sııada, Kavkaz ben Rostov obly­syndaǵy qor­ǵanys shaıqastaryna qatys­qan. 1943 jyly jaýyn­ger­lik erligi úshin oǵan general-maıor ataǵy beriledi. 1944 jyly qazaq­tyń batyr uly 37-gvar­dııalyq at­qyshtar dıvızııasyn basqaryp, Shyǵys Prýssııa operasııasy men Graýdens bekinisine (Grýdzendz, Polsha) shabýyl kezinde erekshe kózge túsedi. 1945 jyly naýryzda Gdansk ma­ńyn­daǵy shaıqasta qazaqtan shyqqan alǵashqy general erlik­pen qaza tabady.

Otanǵa sińirgen eńbegi men kórsetken erligi úshin Sabyr Rahy­­movqa Keńes Odaǵynyń batyry ataǵy qaza bolǵan­nan keıin 1965 jyly ǵana beri­ledi. Dara tulǵaǵa degen qur­met qazaq halqynyń júre­gin­de máńgi saqtalatyny anyq. Al onyń erlik joly Otan qorǵaýshy ur­paq­tardyń aldynda árdaıym úlgi.

Jalpy, Sabyr Rahymov atyn­daǵy áskerı kolledj – Qazaq­stan­nyń Qorǵanys mınıstrligine qarasty respýblıkalyq mem­le­kettik mekemesi. Oqý orny 40 jyldyq tarıhy bar burynǵy respýblıkalyq «Jas ulan» mek­tebiniń bazasynda qurylǵan. Polkovnık Maqsat Aqshalov – osy áskerı kolledjdiń alǵash­qy bastyǵy. Joǵaryda aıtqa­ny­myz­daı áskerı mektep 1984 jyly Shymkentte quryldy. Bastapqyda orys tili men áskerı mamandyqty tereńdetip oqytatyn mektep-ınternat retinde shákirt tárbıeledi. Keıin 1992 jyly Mınıstrler kabınetiniń qaýlysymen mektep respýblıkalyq áskerı mektep bolyp ózgertildi. 2003 jyly áskerı mektep-ınternatqa Keńes Odaǵynyń batyry general-maıor Sabyr Rahymovtyń esimi berildi. 2015 jyly oqý orny Qorǵanys mınıstrliginiń qaramaǵyna ótti.

Osy jyldar ishinde mektep 4 myńnan asa túlek tárbıelep shyǵardy. Olardyń ishinde 7 general, 200-den asa polkovnık pen 3 ǵylym kandıdaty bar. Atal­ǵandardyń barlyǵy qazirgi ýaqytta Qarýly kúshterde nemese basqa da áskerler men áskerı qurylymdar qatarynda qyzmet etedi. Sol azamattardyń ishinen Qorǵanys mınıstriniń tyl jáne áskerı ınfraqurylym jónindegi orynbasary general-leıtenant Qanysh Ábýbákirovti, Qorǵanys mınıstrligi Bas ınspeksııasynyń bastyǵy general-maıor Dáýlet Ospanovty, áskerı-áýe kúshteri­niń qolbasshysy avıasııa general-maıory Rýslan Qońyrovty, Saǵadat Nurmaǵambetov atyndaǵy Qurlyq áskerleri Áskerı ınstı­týtynyń bastyǵy general-maıor Baýyrjan Ibatýlındi erekshe atap ótýge bolady.

ShYMKENT