Qazaq ádebıetin alys-jaqyndaǵy álemge tanytqan, shyn mánindegi klassık jazýshy Dýlat Isabekov daryndy qalamger retinde halyqqa óte erte, jıyrma jasynan bastap tanyldy.
Onyń alǵashqy áńgimeleri men povesteri qazaq ádebıetine jańa lep ákeldi. Sál keıinirek Dýlat Isabekov dramatýrg retinde de jarqyrap kórindi. Qalamgerdiń ádebıetke sińirgen bul ushan-teńiz eńbegi barynsha laıyqty, joǵary baǵalandy. Soǵan oraı Dýlat Isabekovtiń esimi men asa baǵaly mol murasy eshqashan umytylmaı, óz halqymen birge máńgi jasaı beredi.
Men Dúkeńmen ótken ǵasyrdyń 70-jyldarynyń ortasynan bastap biraz jyl «Jalyn» baspasynda birge jumys istedim. Al sońǵy 20 jyldaı ýaqytta T.Júrgenov atyndaǵy Qazaq ulttyq óner akademııasynda bolashaq ssenarıster men dramatýrgterge qatar ustaz bolyp júrdik. Dúkeńmen ótken sol sátterdiń esteligi endi jadymyzda máńgilikke saqtalady. Dańqty qalamgerdiń jatqan jeri jaryq, ımany joldas bolsyn!
Sultanáli BALǴABAEV,
Qazaqstannyń eńbek sińirgen qaıratkeri, jazýshy-dramatýrg