Soltústik Qazaqstan oblysynda qoldan jasalǵan spırttik ishimdikterdi taratý údep tur. Jýyrda polısııa qyzmetkerleri Aqjar aýdanynda reıdtik is-sharalar júrgizý barysynda 39 jastaǵy azamat júrgizip kele jatqan «Mazda» kóligin toqtatqanda, onyń ishinen 100 lıtrdeı zańsyz alkogol tárkilendi.
Júrgizýshi ishimdikterdi plastıkalyq ydystar men bótelkelerge bólip quıyp alǵan eken. Árıne, bulardyń bárinde aksızdik markalar joq bolǵandyqtan, ony qylmystyq jolmen bir jerden qymqyryp nemese arzanǵa satyp alǵany kórinip tur. Zańsyz aınalymǵa shyǵarylǵan alkogoldik ónimder tárkilenip, júrgizýshi ákimshilik jaýapkershilikke tartyldy.
Alkogoldiń zańsyz taralýymen kúres – «Zań jáne tártip» qaǵıdatyn iske asyrýdyń jáne mas kúıde jasalatyn qylmys pen quqyq buzýshylyqtyń aldyn alýdyń mańyzdy bóligi. Qańtar aıynda soltústik polıseıleri barlyǵy 1 145,5 lıtr aksızsiz alkogol tárkiledi.
О́tken jyldyń aıaǵynda alkogolge qarsy zańnamanyń únemi buzylyp otyrǵanyn baıqadyq. Sonyń ishinde jeltoqsan aıynda ǵana ýchaskelik ınspektorlar 95 adamdy alkogoldik ónimderdi satýda zań talaptaryn buzǵany úshin, al 178 adamdy ony jasyryn túrde qoldan jasap satqany úshin ákimshilik jaýapkershilikke tartqan. Barlyǵy 6 myń tonna quramynda spırti bar alkogoldik ónim tárkilengen. Mysal úshin aıtatyn bolsaq, Esil aýdanynyń bir aýylyndaǵy jergilikti turǵynnyń aýlasynan «Ýchastok» profılaktıkalyq operasııasy barysynda quramynda spırti bar 497 lıtr suıyq ónim alyndy. Onyń 697 shıshasy syra, 29 bes lıtrlik plastıkalyq ydysqa quıylǵany araq dep kórsetilgen. Zańdy aınalyp kásipkerlik jasaǵany úshin úı ıesine úlken kólemde aıyppul salyndy. Al Petropavl qalasynyń 62 jastaǵy bir turǵyny saýda úıleriniń birinde ishkilikke beıim adamdardy kózimen baǵyp, olarǵa spırtke sý qosylǵan «araqtardy» arzan satyp kelgen. Ustalǵan kezde onyń 5 lıtrlik plastıkalyq ydysta spırti bolǵan. Sondaı-aq úıinde 15 lıtr, úıiniń aýlasyndaǵy garajynda 213 lıtr spırti tyǵýly turǵan. Buǵan da ákimshilik jolmen aıyppul salyndy.
Oblystyq PD bastyǵynyń birinshi orynbasary, polkovnık Qurmanǵalı Ysmaǵulov ýchaskelik ınspektorlarmen kezdeskende osy taraptaǵy jumysty kúsheıtýdi tapsyrdy.
«Alkogoldiń zańsyz aınalymy barlyq qylmysty isterdiń bastamashysy bolatyny, sondyqtan ony satýdyń tártibi qatań saqtalýy kerektigi eskertildi. Mysaly, urlyq sııaqty qylmystar ashylǵanda, ony jasaǵan adamdardyń bári derlik aldyn ala spırttik ishimdikter iship alatyny is júzinde dáleldenip otyr. Sondyqtan alkogol aınalymyna qatań baqylaý – qylmystyń aldyn alý degen sóz», dedi Q.Ysmaǵulov.
Soltústik Qazaqstan oblysy