Qyzyljardaǵy qyrandar básekesi

Jarystyń alǵashqy kúni búrkit báse­ke­simen bastal­dy. Qusbegiler búrkitti qol­ǵa shaqyrý, shyrǵaǵa salý kezeń­derinde sheberlikterin kór­setti. Jarys qorytyndysynda úzdik shyqqan 18 qus­begi aqtyq márege joldama aldy.

Saıystyń ekinshi kúni qar­shyǵa men ıtelgilerdiń synǵa túsýimen jalǵasty. Bul jarys­tarda da qustardyń alǵyr­lyǵy, ushýǵa daıyndyǵy, ań men qusty alý qabileti jáne qusbeginiń baptaý sheberligi sarapqa salyndy.

Chempıonat qorytyndy­syn­da búrkit qusy sanatynda bas júldeni Aqmola obly­synyń ókili Erlan Kenjetaev jeńip aldy. Ekinshi oryndy Abaı oblysynyń búrkitshisi Erzat Baıqadamov enshiledi. Júl­deli úshinshi oryn Aqmola obly­synyń taǵy bir ókili Rýslan Týmyrzınge  buıyrdy. Qarshyǵanyń alǵyrlyǵy men ep­tiligi synalǵan jarys­ta birin­shi oryndy Túrkistan obly­synyń ókili Arshabaı Dáýren aldy. Odan keıingi oryn­­­dar­dy jambyldyq Serik­bol­syn Jalǵasuly jáne taǵy bir túr­kistandyq Zákı Mahmut­han qanjyǵalaryna bókterdi.

«Iegi ıtelginiń tamaǵyn­daı» dep sulý qyzdyń ıegin sýrettegende qoldanylatyn shaǵyn turyqty ıtelgilerdiń saıysynda qaraǵandylyq Tańat Ospanqulovtyń qusy aldyna jan salmady.  Ekinshi oryndy pavlodarlyq Ermek Imanza­ıyp jáne júldeli úshin­shi oryn­­dy almatylyq Sultanseri Esen­taev­tyń qus­tary ıelendi.

Jarys kúnderinde Qy­zyl­jar óńiriniń aspany jar­qyrap, naǵyz «qar ap­paq, búrkit qara, túlki qy­zyl» dep sıpattalatyn qan­­­sonardaǵy ásem sýret tur­dy. Bul qusbegiler men kórer­menderdiń de delebesin qoz­dyrdy. «Eshkimge zııany joq ózim kórgen, Bir qyzyq isim eken sum jalǵanda» dep uly Abaı aıtqandaı, ultymyzdyń keremet óneriniń biri halyqqa rýhanı lázzat syılady.

Chempıonatty ótkizýge res­pýblıkalyq Qusbegilik fede­rasııasynyń bas seriktesi – «Samuryq Qazyna» UÁQ» AQ, son­daı-aq Týrızm jáne sport mınıstrligi, Soltústik Qazaq­stan oblysynyń ákimdigi, «Týrızm ındýstrııasy men sportty qoldaý qory» KQ jáne Ulttyq sport qaýymdastyǵy demeýshilik jasady.