AQTО́BE. 18 maýsym. Aqtóbede oblystyq Qazaqstan halqy assambleıasy ǵımaratynda Qazaqstan Respýblıkasy Prezıdentiniń janyndaǵy Memlekettik basqarý akademııasy jáne Qazaqstan halqy assambleıasynyń qoldaýymen «Memlekettik etnosaıasatty júzege asyrýdaǵy memlekettik-quqyqtyq tetikter jáne halyqaralyq standarttar» taqyrybyndaǵy úsh kúndik respýblıkalyq semınar-trenıng óz jumysyn bastady. Bul týraly egemen.kz tilshisi habarlady.
Semınar-trenıng jumysyna Prezıdent Ákimshiligi Qazaqstan halqy assambleıasy hatshylyǵynyń, Mádenıet jáne sport mınıstrliginiń, Qazaqstan Respýblıkasy Prezıdentiniń janyndaǵy «Qoǵamdyq kelisim» RMM, adam quqyqtary jónindegi komıssııanyń ókilderi, Memlekettik basqarý akademııasynyń professor-oqytýshylar quramy qatysýda.
Tyńdaýshylar retinde etnosaralyq jáne konfessııaaralyq qatynastar, etnosaıasat máselesimen aınalysatyn memlekettik qyzmetshiler, ákimdikter men máslıhattardyń mamandary, ishki saıasat bólimderiniń jáne din isteri, jastar saıasaty basqarmalarynyń basshylary men mamandary, óńirlerdiń QHA hatshylyqtarynyń meńgerýshileri men mamandary jáne ǵylymı-saraptamalyq toptarynyń músheleri, «Qoǵamdyq kelisim» RMM óńirlik qurylymdarynyń qyzmetkerleri, BAQ ókilderi, Aqtóbe, Atyraý, Batys Qazaqstan jáne Mańǵystaý oblystarynyń etnomádenı, dinı jáne jastar birlestikteriniń jetekshileri qatysýda. Semınar-trenıngtiń saltanatty ashylýynda Qazaqstan halqy assambleıasy oblystyq hatshylyǵynyń meńgerýshisi Joldas Nurshın sóz sóılep, qatysýshylarǵa osy másele boıynsha bilimderin jetildirý baǵytynda sáttilik tiledi. Memlekettik basqarý akademııasy Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵynyń jetekshisi Aıgúl Sadvokasova semınar-trenıngtiń jumysymen tanystyrdy, onyń mańyzy men maqsatyna toqtaldy.
Aımaqtyq semınar-trenıng sheńberinde «Bes ınstıtýsıonaldyq reformany iske asyrý jónindegi 100 naqty qadam: qoǵamnyń bir tektiligi men birligin qamtamasyz etý máseleleri» taqyrybynda dóńgelek ústel ótedi, onda «100 naqty qadam» ult jospary sheńberinde memlekettik etnosaıasattyń qazirgi kezeńdegi basymdylyqtary aıqyndalyp, jańa mindetteri talqylanady.
Semınar-trenıng jumysy barysynda etnoáleýmettik jáne etnokonfessıonaldyq úderisterdi tıimdi basqarýdyń normatıvtik-quqyqtyq bazasynyń teorııalyq jáne tájirıbelik quramdas bólikteri qarastyrylady, quqyqtyq mádenıet toleranttylyqty qalyptastyrý boıynsha trenıngter júrgiziledi.
Sonymen qatar, «Máńgilik El» ıdeıasynyń mádenı-fılosofııalyq negizderi jáne ulttyq birlik pen qoǵamdyq kelisimdi qamtamasyz etý tetikteri talqylanady. Sabaq barysynda memlekettik etnosaıasatty jáne etnosaralyq qatynastardy quqyqtyq qamtamasyz etý máseleleri jóninde jumys tájirıbesimen bólisý jáne pikir almasý alańdary júrgiziledi.
Satybaldy Sáýirbaı.
Derek, sýret: egemen.kz.