Naýryz aıynda ótetin UBT-ǵa qatysýǵa ótinish qabyldaý aıaqtaldy. Testileý 1 naýryz - 6 sáýir aralyǵynda ótedi, dep habarlaıdy Egemen.kz.
Atap ótsek, ótinish berý barysynda talapkerler testileý kúnin, ýaqytyn, pýnktin ózderi tańdady.
Naýryzdaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, ótken jylǵy mektep jáne kolledj túlekteri, QR azamaty bolyp tabylmaıtyn ulty qazaq tulǵalar, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
QR ǴJBM Ulttyq testileý ortalyǵynyń baspasóz qyzmetiniń málimdeýinshe UBT barysynda kalkýlıator, Hımııalyq elementterdiń perıodtyq júıesi (Mendeleev kestesi) jáne tuzdardyń erigishtik kestesi testileý baǵdarlamasynda qoljetimdi bolady. Test tapsyrýshylar testileý aıaqtalǵannan keıin 30 mınýt ishinde apellıasııaǵa ótinish bere alady. Sertıfıkat apellıasııalyq komıssııanyń sheshiminen keıin talapkerdiń jeke kabınetinde shyǵady.
UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. UBT tapsyrmalar sany – 120. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrmadan. Joǵary ball – 140, ol da ózgerissiz qaldy.
Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalady.