ALMATY.19 maýsym. Búgingi tańda qala turǵyndaryna barlyǵy 30 myńnan astam dáriger qyzmet kórsetedi. Olardyń arasynda 334-i ǵylym doktory, 127 professor, 5 akademık bar. Halyqqa qyzmet kórsetetin medısınanyń orta jáne kishi býyn qyzmetkerleriniń alar orny da erekshe. Bul týraly egemen.kz habarlady.
Aq halattty abzal jandardyń kásibı merekesi aldynda ótken saltanatty jınalysta qala ákimi Ahmetjan Esimov saladaǵy jekemenshik medısınalyq ortalyqtar men uıymdardyń da qosyp otyrǵan úlesin erekshe aıtyp ótti. Olardyń sany qazirgi tańda 700-ge jýyqtaǵan.
Adam janyna árdaıym arashaǵa túsýge ázir mamandyq ıelerine tól merekesi kúni laıyqty qurmet kórsetildi. Top jarǵan sala mamandaryna Maqtaý gramotalary men «Densaýlyq saqtaý isine qosqan úlesi úshin» jáne «Densaýlyq saqtaý isiniń úzdigi» atty tós belgiler, baǵaly syılyqtar tabys etildi.
Almatyda halyq densaýlyǵyn nyǵaıtýǵa bólingen qarajattyń kólemi sońǵy úsh jylda 63 mıllıard teńgege jetken. Osy merzim ishinde qalada iri úsh medısınalyq mekeme boı kóterdi. Saltanatqa qatysqan Densaýlyq saqtaý jáne áleýmettik damý vıse-mınıstri Aleksandr Soı taıaý arada Almatynyń Túrksib aýdanynda 200 adamǵa qyzmet kórsetetin emhana ashylatynyn málim etti. Taǵy da iri eki emhananyń qurylysy aıaqtalyp keledi eken.
Saltanatty jıyn Almatynyń óner «júldyzdarynyń» konsertine ulasty.
Talǵat Súıinbaı.
Derek, sýret: egemen.kz.