Polısııa kóshi-qon zańnamasyn buzǵan 700-ge jýyq sheteldik taksı júrgizýshisin anyqtady, dep habarlaıdy Egemen.kz.
Kóshi-qon qyzmetiniń málimetinshe, 5 kún ishinde ótken reıdtik is-sharalar barysynda 46 myń kólik tekserilip, 1 080 sheteldik azamattyń jeke tasymalmen zańsyz aınalysqany belgili bolǵan. Olardyń 691-i qosymshalar arqyly kóshi-qon zańnamasyn buzyp, taksı qyzmetin kórsetken.
Sondaı-aq 234 sheteldik azamattyń el aýmaǵynda zańsyz eńbek qyzmetin júzege asyrǵany anyqtalsa, 457-si Qazaqstanda bolý merzimin buzǵany úshin jaýapqa tartylǵan.
Sot sheshimimen 175 sheteldik taksı júrgizýshisi elden shyǵarylyp, onyń 103-i jeke basyn anyqtaý maqsatynda qabyldaý-taratý oryndaryna ornalastyrylǵan. Sonymen qatar, 38 qazaqstandyq azamat sheteldikterdi zańsyz jumysqa tartqany úshin ákimshilik jaýapkershilik arqalaǵan.