Astanada «Sot tóreligi júıesiniń tıimdiligin arttyrý» atty dóńgelek ústel ótti, dep jazady Egemen.kz.
Jıynǵa sýdıalar, TMD elderiniń joǵarǵy sottarynyń basshylyǵy men sot qoǵamdastyǵy, sot tóreligi salasyndaǵy bedeldi uıymdardyń – Sot tóreliginiń sapasy jónindegi Eýropalyq komıssııanyń jáne Halyqaralyq sot ákimshiligi qaýymdastyǵynyń (IACA), AHQO Soty apparatynyń ókilderi, dıplomattar, halyqaralyq uıymdardyń ókilderi men sarapshylar syndy 100 adam qatysty.
Prezıdenttiń quqyqtyq máseleler jónindegi kómekshisi Erjan Jıenbaev quqyqtyq memleket standarttaryna sáıkes sot júıesin odan ári damytý úshin berik negiz qurýdyń mańyzdylyǵyn, sondaı-aq ozyq halyqaralyq tájirıbeni engizý qajet ekenin atap ótti.
Joǵarǵy Sot Tóraǵasy Aslambek Merǵalıev Qazaqstan basshysynyń bastamalaryn júzege asyrý jáne elimizdiń sot júıesinde onyń tıimdiligin, ashyqtyǵy men qoljetimdiligin arttyrýǵa, onyń ishinde sıfrlyq tehnologııalardy engizýge jáne ozyq halyqaralyq praktıkany eskere otyryp, júıeli qaıta qurylymdaýǵa baǵyttalǵan reformalardy júzege asyrý barysy týraly baıandady.
Joǵarǵy Sot Tóraǵasy sýdıalardyń qyzmetin jeke baǵalaý ádistemesiniń jetildirilip jatqanyn, sot prosesiniń ashyqtyǵyn arttyrýdy, IT-sheshimderdi engizýdi, sýbektilik faktordy azaıtýdy, sondaı-aq sot júıesin bilikti kadrlarmen qamtamasyz etý máselesin ortaǵa saldy.
Astanadaǵy EQYU Baǵdarlamalar ofısiniń basshysy Folker Frobart, QR Konstıtýsııalyq Sotynyń Tóraǵasy Elvıra Azımova jáne Sot tóreliginiń tıimdiligi jónindegi Eýropalyq komıssııanyń tóraǵasy Franchesko Depaskýale Qazaqstandaǵy sot tóreligi júıesiniń tıimdiligin arttyrýdyń ózekti aspektilerine toqtaldy.
️Jıynǵa qatysqan MASA prezıdenti Pamela Harrıs Qazaqstannyń sot júıesine engizilgen ózgeristerdi áserli dep atap, olar sýdıalarǵa ákimshilik máselelerge alańdamaı, tek sot tóreligin júzege asyrýǵa nazar aýdarýǵa múmkindik beretinin aıtty. Spıker reformalardyń, eń aldymen, qysqa merzimde júrgizilip, eń jaqsy nátıje kórsetkendigi men áserli ekenin atap ótti. Negizgi ózgerister sot ákimshiliginiń jańa modelin, sottardy qarjylandyrýdy jaqsartýdy jáne sıfrlandyrýdy damytýdy qamtıtynyna nazar aýdardy.
Sheteldik sarapshylar Qazaqstandaǵy sot ákimshiliginiń qazirgi modeli, sonyń ishinde IT-quraldary sottardyń ashyqtyǵyn arttyryp, aýqymdy derekterdi óńdeýdi jyldamdata alǵanyna, sot prosesine qatysýshylar arasyndaǵy úzilissiz baılanysty qamtamasyz etip, sot qatelerin azaıtyp jáne sotqa degen senimdi nyǵaıtýǵa yqpal etkenine qyzyǵýshylyq bildirdi. Olar sýdıalar men sot qyzmetkerlerin oqytýǵa qatysty da pikirlerin ortaǵa saldy.