Kanadanyń Kvebek qalasynda aıaqtalǵan hokkeı týrnırine 16 elden 120 úzdik komanda qatysty, dep jazady Egemen.kz.
Astanalyq jas hokkeıshiler komandasy alǵash ret Quebec International Pee-Wee Hockey Tournament halyqaralyq týrnırine qatysyp, AA-Elites (11–12 jas) sanatynda kúmis júldeger atanyp otyr.
«Biz osy bedeldi týrnır tarıhyna engenimizge óte qýanyshtymyz. Bul – biz úshin alǵashqy tájirıbe jáne óz komandamyzben maqtanamyz. Eń este qalǵan sát – fınaldyq oıyn, ony 12 myń kórermen tamashalady», dedi komandanyń bas bapkeri Vladımır Zaharov.
Elorda ákimdiginiń resmı saıty atalǵan týrnırge qala ákimdigine qarasty №10 balalar men jasóspirimderdiń shaıbaly hokkeıden mamandandyrylǵan sport mektebiniń tárbıelenýshileri qatysqanyn aıtady.
Atalǵan halyqaralyq týrnır 1960 jyldan beri jyl saıyn ótkizilip keledi jáne 12 jasqa deıingi hokkeıshiler arasyndaǵy álemdegi eń bedeldi jarystardyń biri sanalady.