Qıly kezeńde Qıyr Shyǵystan jer aýdarylǵan káris jurtynyń birazy Tobyl óńirine sińisip, búginde osy topyraqqa tamyr jaıyp, ósip-óngen kóp etnostyń birine aınaldy. Qazir oblysta shamamen 3 800-deı káris ultynyń ókili turady.
Búginde oblystyq assambleıa aıasynda jumys istep jatqan Koreı etnomádenı birlestigi osydan 35 jyl buryn qurylǵan. Sodan beri atalǵan birlestik ókilderi óńirde kópke úlgi bolarlyq talaı ıgi iske muryndyq bolyp, dostyq pen yntymaqty, birlik pen adal eńbekti tý etip ustap keledi.
«Qazaq jerine, qazaq halqyna alǵysymyz sheksiz. Búginde biz óz tilimizdi úırenýge tyrysyp, ulttyq bastaýlarymyzǵa, tarıhymyz ben mádenıetimizge, salt-dástúrimizge qaıta úńilip jatyrmyz. Etnomádenı ortalyqtyń janynan koreı tilin oqytatyn jeksenbilik mektep jumys istep jatyr. Qazirgi jastar koreı tili men mádenıetine yntyq. Sondyqtan jeksenbilik mektepke kelýshiler kóp, onyń ústine munda tegin oqytady. Munyń syrtynda, Qazaqstan koreıleri qaýymdastyǵy ázirlegen qazaq tilinniń oqý baǵdarlamasy bar. «Lingua QKQ» dep atalatyn bul baǵdarlama qazaq tilin tereńdetip oqytýǵa arnalmaǵanymen, turmystyq deńgeıde sóıleýge úıretedi. Qazaq tilin biz mektepte, ýnıversıtette oqımyz, sózdik qorymyz mol, biraq sózdiń qosymshasyn durys aıtpaı qalam ba dep qysylyp, sóıleýge qorqamyz. Jaǵdaıattyq qazaq tiline oqytatyn bizdiń baǵdarlama osy qorqynyshty jeńip, adamdy ári qaraı sóılep ketýge úıretedi», deıdi oblystyq koreı etnomádenı birlestiginiń jetekshisi Ýlıana Kım.
Birlestik ókilderi óńir damýynyń qaı salasynda bolmasyn belsendi. Mysaly, Qostanaıdyń sáýletin kirgizip, ajaryn ashqan kópqabatty zamanaýı záýlim úılerdiń kóbin aǵaıyndy Kımder basqaryp otyrǵan qurylys kompanııasy turǵyzǵan.
Qashanda tııanaqty isimen, aýyzbirshiliktiń kúshimen erekshelenetin Koreı ulttyq ortalyǵy tyndyrǵan ıgi istiń bárin tizbelep shyǵý múmkin emes. Alaıda byltyr jurtty alashapqyn etken alapat sý tasqyny kezinde qaýipti jerlerden evakýasııalanǵan turǵyndarǵa materıaldyq kómek kórsetip, el basyna túsken aýyrtpalyqty kóppen birge kóterisken ulttyq birlestikterdiń ishindegi eń belsendisi bolǵanyn aıta ketken jón.
«Byltyr naýryzdyń 25–26-larynda oblystyń ońtústik aýdandarynda sý tasqyny bastaldy degen sýyt habar jetisimen, úlken júk kóligine shuǵyl azyq-túlik tıep jiberdik. Odan keıin Jangeldın aýdanyna 6 elektr generatoryn, eki motopompa, sábılerge arnalǵan pampers sııaqty sol ýaqytta naǵyz kerek dúnıelerdi jónelttik. Keıin Tobyl ózeni tası bastady. Bizdiń volonterlerimiz qıyn sátte Qostanaıǵa kiretin úlken kópirdi aman alyp qalý úshin kúresip jatqan 500 adamǵa palaý satyp alyp, ystyq tamaq tasydy. Koreı ortalyǵynyń quryltaıshylary, «BK stroı» qurylys kompanııasyn basqaryp otyrǵan aǵaıyndy Kımder tótenshe jaǵdaıdan keıin qurylǵan óńirlik qorǵa 10 mln teńge aýdardy», deıdi Ý.Kım.
Koreı ortalyǵy Qazaqstan men Ońtústik Koreıa eliniń arasyndaǵy eki jaqty dostyq, áriptestik qarym-qatynastyń nyǵaıýyna da kóp septigin tıgizip keledi. Búginde osy baǵytta jasalǵan memorandýmdar aıasynda kóptegen ıgi joba júzege asyrylyp jatyr.
Ýlıananyń aıtýynsha, Ońtústik Koreıada memlekettik bilim grantyn alý óte qıyn, tipti, mundaı ıgilikke jergilikti koreılerdiń ózderi de ońaılyqpen qol jetkize almaıtyn kórinedi. Alaıda Seýl, Pýsan ýnıversıtetteri jyl saıyn Qazaqstanda turyp jatqan koreı jastaryna tegin memlekettik bilim granttaryn bólip otyrady. Munyń syrtynda, eki el arasyndaǵy halyqaralyq kelisimshart aıasynda bizdiń hırýrg dáriger, hırýrg medbıkeler jyl saıyn irikteýden ótip, Seýl klınıkalarynda tegin tájirıbeden ótip keledi. Jergilikti koreıler Ońtústik Korıadan ártúrli saladaǵy jańa tehnologııalardy ákelip osy jerde kásipen shuǵyldanyp jatyr. Onyń ishinde «aqyldy» qurylǵylary bar jylyjaı ákelip, jemis-jıdek, kókónis ósirip jatqandar kóp.
«Buryn aǵaıyndarymyz, kóbine, jastar, tarıhı otanymyzǵa qaıta bastaǵanda, Qazaqstan koreıleriniń keleshegine alańdaýshy edik. Qazir bul úderis saıabyrsydy. Ol jaqta jańa tehnologııany, jańa ádisterdi meńgergen jastardyń birazy óńirge qaıtyp oralyp, osy jerde kásip ashyp, eńbek etip jatyr. Taǵdyrdyń tálkegimen qonys aýdarǵan túrli etnos ókilderin qazaq halqy baýyryna basyp, qamqorlyq tanytty. Alǵys aıtý kúni – osy topyraqty mekendegen san ulttyń basynan ótken qasiret pen aýyrtpalyqtan sabaq alatyn kún, yqylas pen meıirimge taǵzym etetin kún», deıdi birlestik jetekshisi.
Qostanaı oblysy