Adam jaratylysy kúrdeli. Ol árkez súıispenshilik, tańǵalý, ókpeleý, qýanysh-qaıǵy, meıirim-shapaǵat, t.b. sezimder jeteginde júredi. Osy sezimderdi sheginen asyrmaı tizgindep, olardy turaqtylyq pen tepe-teńdik jaǵdaıynda ustaı bilgen adam ókinishke urynbaıdy. Iаǵnı joǵarydaǵy árqıly sezim qubylysyn tizgindep, retteı bilgen kisi baqytty otbasyn qura alady.
Ishki sezimi qubylmaly pendeler qurǵan shańyraq uzaq ǵumyrly bolýy qıyn. Sondaı-aq ózimshil, tákappar adamdar da otbasy baqytyn tolyq túsine almaıdy. О́ıtkeni otbasy baqyty – meıirimdilik pen qaıyrymdylyqqa negizdelgen.
Adam balasynyń ómirin týlap-tolqyp, býyrqanyp jatqan teńizge teńesek, sol bir asaý buıra jal-jal tolqyndardyń soǵýynan sharshaǵan pende bir sát, jaıly ystyq qum tóselgen jyp-jyly jaǵajaıǵa baryp dem alǵysy keledi. Jaıly otbasy degenimiz – sol bir ystyq jaǵajaı. Adam arpalysyp jatqan tirlikten sharshaǵanda, baryp jan tynyshtyǵyn tabatyn oryn – otbasy. О́ıtkeni otbasynda syrtqa shyqpaıtyn qaıǵy-muń, qýanysh-renish tarqaıdy. Iаǵnı jaıly otbasynda bóliske túsken qýanysh kóbeıedi, qaıǵy azaıady.
«Adamdar ne úshin otbasyn qurady?» degen suraqqa Batys pıshologteri: «О́mirdi bólisý úshin úılenedi» dep jaýap beripti. Iаǵnı ómir – árkez tep-tegis, jap-jaqsy baqytty, shattyqty kúnderden turmaıdy. Baqytty otbasy degenimiz – birin-biri túsine alatyn, únsiz syılasa biletin juptar. Túsinisý degen – turmysta kezdespeı qoımaıtyn qaıshylyqtardy ýshyqtyrmaı, urys-kerissiz sheshý. Árıne, adamdar bir-birine uqsamaıdy. Sóıte tura bir-birine uqsamaıtyn eki adamnyń ortaq januıa quryp, ómir súrýi de ońaı sharýa emes.
Baqytty otbasynyń belgisi – erli-zaıyptylar bir-birine táýeldi emes, alaıda bir-birine adal, jipsiz baılanǵan túrde ómir súrýge daǵdylanýy. Bul beriktik eki juptyń jan dúnıeleriniń jaqyndyǵy jáne sezim tazalyǵy arqasynda ornaıdy. Osy adaldyq pen beriktik januıaǵa erekshe serpin berip, kóńilge shattyq uıalatady.
Eger bulaı bolmaǵan jaǵdaıda, olar syrt kózge kúlip-oınap, shattyqta júrgen sııaqty kóringenimen, rýhanı turǵydan júdeý, qıyndyq tap kelse qulaýǵa daıyn turady. Munyń sońy eki jaqtyń ajyrasýyna aparyp soǵady. Shańyraǵy shaıqalǵan jarymjan jandardyń rýhy kúızelip, hali nasharlaıdy. Mundaı kúıge ushyraǵan tusta dúnıe men aqyret, aqyl men júrektiń tepe-teńdigin saqtaý qıyndaı túsedi.
Baqytty otbasynda erli-zaıyptylar ózderine tán jaqsy qabiletterin tumshalamaı, birin-biri baǵalap, sanasyp otyrady. Máselen, eri áıeliniń ózgermeli kezderindegi sezim aýytqýshylyǵyna jyly shyraı tanytyp, kóńilin aýlaıdy. Áıeli de kúıeýiniń jumystan arqalap kelgen aýyrtpashylyǵyn umyttyryp, jubata biledi. Otbasyndaǵy talas-tartys esikti japqan kezde syrtta qalýy kerek. Ishke kirgen búlik otbasyn búldiredi. Sol sebepti otbasynda qandaı bir kishkentaı túsinispeýshilik paıda bola bastasa, ony tezirek syrtqa shyǵaryp tastaý kerek.
Birin-biri qurmetteıtin januıalar sheshim qabyldar kezde aqyldasyp, ortaq jaqsy joldy tańdaıdy. Bulaı isteý otbasylyq kelispeýshilik pen kıkiljińge jol bermeıdi, talas-tartys pen janjaldyń aldyn alady. Nátıjesinde, ortaq aqyldasýdyń jemisi – januıaǵa shyraı berip turady.
О́mirde kóp kezdesetin másele – baqytty otbasy qurý úshin qoǵamda dara tulǵa bolý shart emes. Qoǵamda tulǵalar kóp bolǵanymen, úlgi-ónege alatyndary shamaly. Osyndaı betke ustar tulǵalardyń úlgili otbasy qurýǵa dármensizdigi, olardyń ómirine qunsyz túsinikter basymdyqqa ıe bolýynan. Olar otbasy máselesinde, erkek pen áıeldi bólip-jaryp, árqaısysyna jeke-jeke mańyz júktep, bala men jigitti bólek-bólek sanatqa jiktep, osy bólinisti bir-birimen baılanysy joq dep túsiný – óte qate. Mundaı túsinik bar jerde otbasylyq yntymaq saqtalmaıdy. Shyn máninde, erkek pen áıel bútin zattyń eki bóligi bolǵany sııaqty jastyq, balalyq, jigittik, qarııalyq... kezeńder birinen birin bólip qaraıtyn bólek kategorııalar emes, ózen sııaqty úzilissiz aǵyp jatqan ómirdiń zańdy jalǵasy ispetti. Osyny tolyq túsinip, osyǵan beıimdelip, amal jasaǵan otbasy ǵana baqytqa bólenedi.