Ekologııa jáne tabıǵı resýrstar mınıstri Erlan Nysanbaev Úkimet otyrysynda kóktemgi aýa raıy boljamynyń jańartylǵan derekterin usyndy, dep habarlaıdy Egemen.kz.
Mınıstrdiń aıtýynsha, bıyl naýryz jáne sáýir aılary ádettegiden jyly bolady dep kútiledi. Sonymen qatar, elimizdiń basym bóliginde jaýyn-shashyn mólsheri kóp túsedi. Bul kóktemniń erte kelýine jáne sý tasqyny qaýpiniń artýyna áser etedi.
Sý tasqyny qaýpi joǵary óńirlerdiń qatarynda: Aqtóbe, Qostanaı, Qaraǵandy, Aqmola, Soltústik Qazaqstan, Shyǵys Qazaqstan oblystary jáne Ulytaý jáne Abaı oblystary bar.
Qaýiptiligi ortasha óńirler: Almaty, Jetisý, Jambyl, Batys Qazaqstan jáne Atyraý oblystary. Tasqyn qaýpi tómen óńirler: Pavlodar, Mańǵystaý, Túrkistan jáne Qyzylorda oblystary.
«Bıyl Qazgıdromet alǵash ret ár oblys boıynsha egjeı-tegjeıli anyqtamalar daıyndady. Bul anyqtamalarda gıdrologııalyq beketter boıynsha sý deńgeıiniń jáne aǵysynyń kútiletin eń joǵary mánderi, aǵyn kólemi jáne sondaı-aq qaýip aımaǵynda ornalasqan eldi mekenderdi kórsete otyryp, boljamdy bastalý kúnderi kórsetiledi. Sondaı-aq ótken aptadan bastap Qazgıdromet apta saıynǵy gıdrologııalyq boljamdardy shyǵara bastady. Gıdrometeorologııalyq jaǵdaı kúrt ózgeretin bolsa «Qazgıdromet» eskertýlerdi 2-3 táýlik buryn habarlaıdy», dedi Erlan Nysanbaev.