Jany názik demeseńiz, áıel balasy qoǵamnyń qaı salasynda da erlermen ıyq tirestire eńbek etip keledi. Temirdeı tártip ornaǵan mekemege jyp-jyly shýaq syılap júretin de solar. Aınalamyzda mundaı qaısar hanymdar az emes. Uzaq jyl boıy keden salasynda tabysty eńbek etip júrgen Bıbigúl Turysbekqyzynyń ómir ónegesi san synaqtan súrinbeı ótip, jigeri muqalmaǵan qaıratty jannyń jarqyn úlgisin kóz aldymyzǵa ákeledi.
Eńbek jolyn joǵary oqý ornynda muǵalim bolyp bastaǵan keıipkerimizdiń keden salasyna kelýi kezdeısoq emes. Taǵdyr qosqan serigi Bolat Musabekovtiń jumys babymen shekara shebindegi Dostyq beketine qonys aýdaryp, qalalyq jaıly ómirdi artqa tastaǵan erli-zaıyptylar armanǵa birge qanat qaqqan. Bolat – keden ınspektory, Bıbigúl mektepke muǵalim bolyp ornalasty. Aısulý men Júsip esimdi ul-qyzdary ómir esigin ashty.
Ol kezde Qytaı shekarasyna jaqyn stansaǵa kedendik ınspektor bolyp qyzmetke turǵan jas mamandy alda qandaı synaq kútip turǵany beımálim edi. О́mirge qushtar azamattyń armany Dostyq-Úsharal tas jolyndaǵy qarly boranda úzildi. Qapııada jarynan aıyrylý Bıbigúlge úlken soqqy boldy. «Qaıǵyny kótergen adam shyńdalady» degendeı, keler kúnnen úmit úzbegen ol shıetteı eki balasynyń bolashaǵy úshin kúıeýiniń jumysyn jalǵastyrýǵa bel býdy. 2002 jyly keden salasyndaǵy jaýapkershiligi mol jumysqa kiristi. Sol sátten bastap onyń ómiri jańa arnaǵa tústi.
«О́tken kúnderdiń elesin sholyp ótkende, kóńilge kóp oı oralady. Basqa túsken synaq adamdy qaırattandyrady eken. О́kpek jeldiń ótinde júrip, alǵa umtyldym. Quladym, qaıta turdym. Qudaı adamǵa kótere almaıtyn synaq bermeıdi degeni ras eken. Azamatymnyń oshaǵyn óshirmeı, ul-qyzyn aıaqtandyryp, adal eńbegimniń jemisin kórip otyrmyn», deıdi Bıbigúl Turysbekqyzy.
Dostyq stansasyndaǵy jumysyn 2012 jylǵa deıin jalǵastyryp, sol jyly keden qyzmeti qaıta uıymdastyrylǵan tusta Almaty oblysy boıynsha memlekettik kirister departamentiniń bas mamany qyzmetine kiristi. Eńbegi janǵan bilikti mamandy áriptesteri men ortasy óz isiniń bilgiri retinde qurmetteıdi. Qyzmet joly 2013 jyly Qorǵas kedeninde bas maman, keıinirek «Qorǵas-Shyǵys qaqpasy» halyqaralyq yntymaqtastyq ortalyǵynda, Qaljat keden beketinde jalǵasyn tapty.
Shekara shebinde eńbek etý úlken kúshti qajet etedi. Qajyr-qaıratyń men densaýlyǵyńdy da sarp etetin sátter az emes. 2022 jyly Altynkól keden beketinde qyzmet atqaryp júrgende Bıbigúl Turysbekqyzy mı arterııalarynyń trombozynan ınsýlt aldy. Bul oǵan aýyr synaq boldy, biraq myqty erik-jigeri men otbasynyń qoldaýy oǵan dem berdi. Syrqatynan aıyǵyp, súıikti jumysyna qaıta oraldy. Búginde Jetisý oblysyndaǵy «Altynkól jol» keden beketindegi qyzmetin jalǵastyryp jatyr.
О́z isine janymen berilgen maman uzaq jylǵy eńbeginiń arqasynda zor qurmetke ıe boldy. Keden organdaryndaǵy 10, 20 jyl minsiz qyzmeti úshin medaldarymen, keden qyzmetiniń 30 jyldyǵyna arnalǵan mereıtoılyq medalmen, sondaı-aq «Ofıserdiń anasy» medalimen marapattaldy. «Eń úlken eńbek – urpaq tárbıesi» degen ana balalarynyń ómirden óz jolyn tapqanyna qýanady. Búginde qyzy Aısulý Almatydaǵy Qytaı bankinde jetekshi aýdıtor bolyp eńbek etse, uly Júsip Sybaılas jemqorlyqqa qarsy qyzmet salasynda, kapıtan sheninde jumys isteıdi.
Myqty maman – qaı ujymnyń da maqtanyshy. Qýatty qurylymnyń tynys tirshiligin tereń sezinetin Bıbigúl Turysbekqyzyna el ıgiligi jolyndaǵy eńbegińiz elene bersin deımiz.
ALMATY