Jezqazǵan men Sátbaev qalalaryna ortaq qoqys polıgony salynady. Qoldanystaǵy polıgon Jezqazǵan qalasynan 20 shaqyrym qashyqtyqta ornalasqan. Kúnine shamamen 150 tonna qoqys tógiledi. Taý bolyp úıilgen qoqysty órtegende aınalaǵa jaǵymsyz ıis taraıdy.
Mamandar Jezqazǵan qalasyndaǵy qoldanystaǵy polıgonnyń sanıtarlyq, ekologııalyq kodeks talaptaryna sáıkes kelmeıtinin aıtady. Bıyl Jezqazǵan qalasynyń bas josparyna sáıkes jańadan polıgon salý josparlanyp otyr. Sondaı-aq qoqys pen qatty turmystyq qaldyqty qaıta óńdeıtin shaǵyn zaýyt salynady. Zaýytta jylyna 50 myń tonna qaǵaz, plastık, rezeńke buıymdary qaıta óńdeledi.
Qoqys polıgony Jezqazǵan men Sátbaev qalalaryna ortaq bolady. Eki qalanyń ortasyndaǵy óndiristik aýmaqta ornalasady. Jer ýchaskesi bólinip, ınvestor anyqtaldy. Jańa polıgonnyń negizgi aýmaǵy 17 gektardy quraıdy.
Oblystyq tabıǵı resýrstar jáne tabıǵatty paıdalanýdy retteý basqarmasy basshysynyń mindetin atqarýshy Abzal Ahmetbekov: «Eki nysandy salýǵa shamamen 900 mln teńge qajet. Qarjynyń 30%-y ınvestordyń óz esebinen, qalǵanyn ónerkásipti damytý qory lızıng túrinde beredi», dep málimdedi.
Ekologııalyq kodekske sáıkes eski polıgondy joıý jumystary júrgiziledi.
Ulytaý oblysy