Qyzylorda oblysyndaǵy Aral qalasynda mereke «Jańa ómir, jańa jyl, jańa kúnmen kórisý» atty qoıylym – konsertten bastaldy. Halqymyzdyń kóshpeli mádenıetin keńinen dáriptegen kerýen qalanyń basty kóshesimen júrip ótip, ortalyq alańda jurtshylyqpen kóristi, dep habarlaıdy Egemen.kz.
Ortalyqta tigilgen aqshańqan úılerde túrli taqyrypqa saı is-sharalar uıymdastyryldy. Aýdan ákimi Amanjol Ońǵarbaev bastaǵan zııaly qaýym el-jurtty merekemen quttyqtady.
Qaz-qatar tigilgen úılerde bir mezette «Naýryz – qut-bereke bastaýy» atty keń kólemdi kitap kórmesiniń tanystyrylymy, et, sút jáne nan ónimderiniń kórmesi, jyraýlar shoǵyrynyń «Kósh kerýeni», «Qut bolyp kel elime – áz Naýryzym!» atty teatrlandyrylǵan qoıylym konsert uıymdastyryldy. Osylarmen qatar toǵyzqumalaq saıysy, «Jańa ómir, jańa jyl, jańa kúnmen kórisý», «Bereke men birliktiń bastaýy» atty qoıylym, halqymyzdyń ejelgi turmys saltynan syr shertetin murajaı tanystyrylymy, «Kórisý – kóńildiń kilti» atty qoıylymdar ótti.
Naýryznama onkúndigine oraı san-alýan taqyrypqa negizdelgen mádenı is-sharalardy aýdandaǵy túrli mekemeler men derbes bólimder ótkizedi.