Aqtóbe oblysy Oıyl aýdanynda erigen qar sýy ýaqytsha salynǵan ótkeldi buzyp ótti, dep habarlaıdy Egemen.kz.
Aýdan ákimdigi bul aqparatty rastady. Qazirgi ýaqytta aýylda qalpyna keltirý jumystary júrip jatyr, al sý basqan aımaqta kólik qozǵalysy toqtatyldy.
- О́tken jyly kóktemgi sý tasqyny saldarynan negizgi kópir zardap shekkendikten, ol jóndeýge jabyldy. Jergilikti turǵyndardyń qatynaýy úshin bir shaqyrym qashyqtyqta ýaqytsha topyraq ótkeli salynǵan edi. Búgin sol ótkeldi Oıyl ózeninen kelgen erigen qar sýy shaıyp ketti, – dep málimdedi Aqtóbe oblysy ákimdiginen.
Qazirgi tańda jergilikti turǵyndardyń ózennen qaýipsiz ótýin qamtamasyz etý sharalary qolǵa alynýda.
2024 jyldyń kókteminde Oıyl aýdany tasqyn sý astynda qalǵan bolatyn. Bıyl da Aqtóbe oblysy sý tasqyny qaýpi joǵary aımaqtardyń qatarynda. Oblys ortalyǵynyń turǵyndaryna sý tasqyny kezinde evakýasııaǵa daıyn bolý kerektigi eskertildi.