Jańa jyldan keıingi jaǵymdy jańalyqtardyń biri - Astana qalasynyń jańa aýdany – Saraıshyqta №112 orta bilim beretin Jaıly mektep oqýshylarǵa esigin aıqara ashty. Kúni keshe sol bilim oshaǵy oqýshylar men ata-analarǵa arnap «Jaıly mektep - jańa serpin» atty alǵashqy keshin uıymdastyrdy, dep jazady Egemen.kz aqparat agenttigi.
Áz-Naýryz merekesiniń Ulttyq qundylyqtar kúnine dóp túsken sharada kishigirim dastarhan jaıylyp, qazaqttyń ulttyq oıyndary oınatyldy. Sodan keıin kópshilik mektepke ekskýrsııa jasap, arnaıy kórmemen tanysty.
Mektep dırektory Qaıyrly Qalıbekulynyń sózinshe, Prezıdenttiń bastamasymen qolǵa alynǵan ulttyq joba aıasynda irge qalaǵan bilim oshaǵy búginde qalypty jumys istep jatyr.
«Jańa ujymnyń tatýlyǵy men birliginiń, yntymaǵynyń arqasynda bastapqy kezeńdegi qyrýar sharýany eńserdik dep oılaımyn. Alǵashqy merekelik basqosýymyzdyń Naýryz meıramymen tuspa-tus kelgenin jaqsylyqqa balaıtynymyz taǵy ras. Biz endi jas býyndy sapaly bilimmen sýsyndatyp, tanymdaryn keńeıtip, taǵylym men tárbıe beretinimizge sendirgim keledi. Qazirgi tańda mektepte myńnan astam oqýshy bilim alyp jatyr, tegin úıirmeler de jumysyn bastap ketti. Arnaıy kıim úlgimiz de bekitildi», - dedi ol jıynda.
Sondaı-aq ata-analar komıtetiniń tóraıymy Gúlnur Aıdarova da mektep ujymy men oqýshylarǵa sáttilik tiledi. Ol mekteptiń rasynda jaıly ekenin, materıaldyq-tehnıkalyq bazasynyń joǵary deńgeıde ekenin alǵa tartty. Sonymen qatar ustazdardyń biliktiligine, qarym-qatynasyna kóńili tolady ata-analardyń.
Osy merekede «Ákeler klýbyny» tóraǵasy Ádilbek Kúzembaıuly «О́mir» ánin shyrqasa, 6 synyp oqýshysy Tóleýqadir Ánýar «Jaqsy adamdarym» ánin náshine keltirip oryndady. Sonymen qatar ónerli oqýshylar «Balbyraýyn» kúıin kópshilik nazaryna usyndy. «Baldyrǵan» vokaldy toby men «Sát» bı ansambliniń óneri de kókrermenniń ystyq yqylasyna bólendi.
Elimizge tanymal «Saryarqa» tobynyń negizin qalaǵan top múshesi, ánshi Qanat Sembekov, QR Prezıdenttik orkestriniń solısti, ánshi Oralhan Altynbekov, QR eńbek sińirgen qaıratkerleri, ánshi, sazger Medet Salyqov, «Qurmet» ordeniniń ıegeri, ánshi Klara Tólenbaevalar da osy jıynnyń ortasynda bolǵanyn atap ótken jón.
Aıta keteıik, «Jaıly mektep» ulttyq jobasy aıasynda 2025 jyldyń sońyna deıin 460 myń oryndyq 217 zamanaýı mekteptiń qurylysy josparlanǵan, onyń ishinde 105 mektep 2024 jyly salyndy. Mektep zamanaýı talaptarǵa saı keletin tegin bilim alý múmkindigin qamtamasyz etýge baǵyttalǵan. Bastama Jaıly mektepterdiń materıaldyq-tehnıkalyq bazasyn jaqsartyp qana qoımaı, balalardyń shyǵarmashylyq jáne ıntellektýaldy qabiletterin damytýǵa yqpal etetin orta qalyptastyrady.
Ásel Muratbekqyzy, №112 Jaıly
mekteptiń qazaq tili men ádebıeti páni muǵalimi