Búgin Túrkııa prezıdenti Rejep Taıyp Erdoǵannyń basty saıası qarsylasy Ystanbul qalasynyń meri Ekrem Imamoglý men onyń baspasóz keńesshisi Murat Ongýn arnaıy operasııa kezinde tutqyndalǵan edi. Iske qatysty barlyǵy 100 adam kúdikti retinde tergelip jatyr, dep habarlaıdy Egemen.kz.
Túrkııanyń resmı ókildiginiń habarlaýynsha, Ystanbul Bas prokýratýrasy júrgizip otyrǵan tergeý aıasynda búgin tańerteń 106 kúdiktige, sonyń ishinde Ystanbul mýnısıpalıtetiniń ákimine qamaýǵa alý týraly order berildi. Buǵan baılanysty Ystanbul Bas prokýratýrasy eki túrli tergeý júrgizip jatyr.
Birinshisi – terrorızm qylmystaryn tergeý bıýrosy tarapynan júrgizilip jatqany habarlandy. Bul tergeý aıasynda mýnısıpalıtet basshysy da bar 7 adamdy qamaýǵa alý týraly order shyǵaryldy. Tergeý barysynda kúdiktiler terrorıstik uıymǵa kómektesti degen aıyp taǵylyp otyr.
Ekinshisi – uıymdasqan qylmysty tergeý bıýrosy tarapynan júrgizilip jatyr. Bul tergeý aıasynda mýnısıpalıtet basshysyn qosa alǵanda 100 kúdiktige qamaýǵa alý týraly order berildi. Olarǵa para alý, bopsalaý, tenderge qatysty sóz baılasý, alaıaqtyq jáne qylmystyq uıym arqyly paıda tabý maqsatynda jeke derekterdi zańsyz ıemdený sekildi qylmystar jasady degen aıyp taǵylyp otyr. Eki tergeýdiń nátıjesinde barlyǵy 106 kúdiktige qatysty qamaýǵa alý orderi shyǵaryldy.
Ystanbul Bas prokýratýrasynyń málimdemesine sáıkes, tergeý materıaldarynda MASAK (Qarjylyq qadaǵalaý agenttigi) esepteri, salyq saraptamalary, depozıtter týraly esepter, kýágerlerdiń aıǵaqtary jáne ózge de dálelder qamtylǵan. Tergeý barlyq qyrynan muqııat ári egjeı-tegjeıli júrgizilýde ekenin habarlaǵan.
«Túrkııa Respýblıkasy – quqyqtyq memleket. Bizdiń Konstıtýsııamyzdyń 9-baby óte anyq:
Sot bıligi táýelsiz jáne beıtarap sottar arqyly túrik ultynyń atynan júzege asyrylady. Barlyǵy zań aldynda teń, eshkimge nemese eshbir topqa artyqshylyq berilmeıdi. Konstıtýsııanyń 138-babyna sáıkes, sottar táýelsiz. Eshbir organ, mekeme, tulǵa nemese ınstansııa sot bıligin júzege asyratyn sýdıalarǵa buıryq nemese nusqaý bere almaıdy, sırkýlıar jibere almaıdy, keńes nemese usynys jasaı almaıdy. Qylmystyq is júrgizý kodeksiniń 157-babyna sáıkes, tergeý prosesi qupııaǵa jatady», deıdi Túrkııa Respýblıkasynyń Ádilet mınıstri Iylmaz Týnch. Onyń aıtýynsha, bul qupııalylyq – ádil sot júrgizý, adam quqyqtarynyń buzylmaýy, kinásizdik prezýmpsııasyn saqtaý jáne abyroı men qadir-qasıetti qorǵaý úshin óte mańyzdy. Aıyptaýlar men dálelderdi bilmeı jatyp, bastalǵan tergeýge baǵa berý durys emes.
Sondyqtan táýelsiz jáne beıtarap sot organdary júrgizip otyrǵan tergeýlerge saıası sıpat berip, olardy «memlekettik tóńkeris» dep ataý – óte qaýipti jáne orynsyz. Sonymen qatar, tergeýlerge qatysty jalǵan aqparat taratý, halyqty adastyratyn kóshe aksııalaryn uıymdastyrý durys emestigin de jetkizdi.
Sonymen birge Túrkııa Respýblıkasynyń Ádilet mınıstri quqyqtyq ádildikke qol jetkizý úshin emosııaǵa berilmeı, sabyrmen áreket etýimiz qajettigin jetkizgen. Bul oraıda tergeý barysynda taǵylǵan aıyptar, qorǵaý dálelderi jáne dáleldemeler muqııat qarastyrylmaq. Tergeý qupııasy alynǵan soń, qoǵam bar shyndyqty aıqyn ári ashyq túrde kóredi.