Ár jyly áz-Naýryz qarsańynda kishkentaı kórermenderin erekshe qoıylymdarymen qýantýdy dástúrge aınaldyrǵan Almaty Memlekettik qýyrshaq teatry «Jyl on eki aı» atty qazaq halyq ertegisiniń jelisimen «Naýryz qupııasy» atty jańa týyndysyn sahnaǵa shyǵardy. Bul týyndy el Prezıdenti Qasym-Jomart Toqaev bekitken «Naýryznama» tujyrymdamasyna negizdelgen. Ár kúnniń ózindik maǵynasy bar merekelik onkúndik sheńberinde spektakl kórermenderge Naýryzdyń rámizdik mánin aıshyqtap, baýyrmaldyq pen meıirimdilikke, qamqorlyq pen janashyrlyqqa, rýhanı tazarý men jandanýǵa zeıin sala otyryp, ulttyq kıimderdiń, sport túrleriniń jáne mádenı muralardyń mańyzyn kórermen sanasyna darytady.
Jyl basy bolýǵa talasqandardyń arasynan túıeniń ústine órmelep shyǵyp, jańa jyldy birinshi bolyp kóretin aılaker tyshqannyń aqyly men qýlyǵyna qurylǵan ádepki ertegiden alshaq ketip, jańa pishinge boı urǵan bul qoıylym shym-shytyryq oqıǵalar men tańǵalarlyq túrli keıipkerler arqyly ǵasyrlardan mura bolyp saqtalǵan rýhanı qundylyqtar, qazaqy tanym-túsinik, ulttyq salt-dástúr, nanym-senimderdi dáripteıdi. Kóktem merekesiniń shyraıyn keltirip, mańyzyn arttyratyn merekede ańyzǵa aınalǵan keıipkerler – Qydyr ata, Kún men Tún, Tyshqannan bastap Dońyzǵa deıingi jyl ıeleri kórermenderge ulttyq oıyndar men bıler usynyp, Naýryz meıramynyń mánin ashyp kórsetedi.
– Naýryzdyń basty qupııasy Kún men Túnniń teńesýi bolsa, bir-birimen keńesip jyl basyn tańdaýynda ár jyldyń aıtar oıy, júrekke jetkizer syry, jadydan óshpeıtin ǵıbraty bolǵan. Inssenırovka avtory Jazıra Ahmetovamen keńese otyryp, ertegini jańasha sheshimmen usynýdy jón kórdik. Jyl on eki aıdyń bári sahnaǵa ulttyq kıimmen shyǵady. Spektakl + 5 jastan joǵary kórermenge arnalǵan. «Adam jeti jyl ómir súredi, qalǵan ýaqytta balalyq shaǵyn izdeýmen ótedi» deıtin támsil bar emes pe? Almaty Qýyrshaq teatry – adamǵa saǵynysh syılaıtyn teatr. Án men kúıge baı ultymyzdyń ónerin meılinshe jarqyrata otyryp, qulaqqa sińgen belgili kúılerdi zamanaýı óńdeýmen qaıta jańǵyrtyp, qoıylymdy qyzyqty jasaýdyń tásilderin tabýǵa tyrystyq. Interaktıvti saýaldar qoıyp, kórermendi spektakl oqıǵasyna tikeleı aralastyryp otyramyz. Sondaı-aq qylyshtasý, áteshtiń tańǵy shaqyrýy, ógizdiń soqa tartýy, qoıdyń júninen kıiz basýdy plastıkalyq sheshimdermen kórsete otyryp, jan-janýardyń mıfologııalyq mańyzy men turmystaǵy kól-kósir paıdasyn, ózge de ereksheligin balalardyń sanasyna sińirýdi maqsat ettik, – deıdi «Naýryz qupııasynyń» rejısseri Shoqan Qulnazarov.
Jańa jyl ıesi atanýǵa talasqan janýarlar artyqshylyqtary men jaqsy qasıetterin alǵa tartyp, shapshańdyǵy men tapqyrlyǵy synǵa túsetin óner saıysyn uıymdastyrady. Ádil sheshim shyǵarýǵa bel baılaǵan Kún men Tún baıqaý jarııalap, janýarlardyń aqyldylyq, aılakerlik, shapshańdyq, tapqyrlyq qasıetterin sarapqa salady. Tartysty báıgeniń jeńimpazyn birge anyqtaýǵa shaqyrady. Bul spektakl merekelik baǵdarlamanyń kórkin kirgizip, kórermenge umytylmas áser syılaıdy. Spektakl kishkentaı kórermenderdi dostyqqa, adaldyqqa, birlikke, ultjandylyqqa úndeıdi.
ALMATY