Azyq-túlik qaýipsizdigine erekshe mán beriledi

Májilis spıkeri qazirgi zamanda halyqty sapaly ári qaýip­siz azyq-túlikpen qamtamasyz etý jahandyq kún tártibindegi ózekti problemanyń biri ekenin atap ótti. Bul rette Qazaqstan azyq-túlik qaýipsizdigine erekshe mán berip, osy máseleni sheshýge múmkindiginshe óz úlesin qosyp keledi.

– Azyq-túlik qaýipsizdigine memleketimizdiń basshysy Qasym-Jomart Kemeluly jete kóńil bóledi. Bıyl qańtarda Arab Ámirlikterinde ótken «Abý Dabıdiń ornyqty damý ap­ta­lyǵy» sammıtinde osy máse­lege arnaıy toqtalyp ótti. Búgin­de álem klımattyń ózgerýi, qýań­shylyq, bıoalýantúrliliktiń joıylýy, sý tapshylyǵy, azyq-túlik qaýipsizdigi sekildi asa ózekti problemalarmen betpe-bet kelip otyrǵanyn aıtty. Prezıdent Qazaqstannyń atalǵan túıtkilderdi basty úsh baǵytqa – sıfrlandyrý men jasandy ıntellekt, iri ınfraqurylym­dyq jobalar jáne ıadrolyq energetıka salalaryna negizdel­gen strategııa arqyly sheshý­ge nıetti ekenin jetkizgen edi. Osy turǵyda biz parlamentarııler retinde Prezıdent bastamalaryn zańnamalyq turǵy­dan qamtamasyz etýge daıyn ekenimizdi málimdeımiz, – dedi E.Qoshanov.

Áńgime barysynda taraptar qazirgi zamanǵy syn-qater­ler men táýekelderdi eńsere otyryp, azyq-túlik qaýip­sizdigin qamtamasyz etýdiń mańyzdylyǵyna basa mán ber­di. Bul rette Azyq-túlik qaýipsiz­digi jónindegi ıslam uıymynyń áleýeti zor.

Berik Aryn uıymnyń qazir­gi qyzmeti týraly aqparat berip, aldaǵy josparlarymen bólis­ti. Qazaqstanmen tyǵyz qarym-qatynasta jumys atqarylyp jatqanyn aıtyp, birlesken jobalarǵa toqtaldy.

Bıyl Astanada Azyq-túlik qaýipsizdigi jónindegi ıslam uıymynyń Bas assambleıasynyń 7-otyrysy ótip, uıymǵa tóraǵa­lyq Qazaqstanǵa ótedi. Sonyń aıasynda jahandyq azyq-túlik qaýipsizdigi máselesi baǵytynda biraz jumys atqarý josparlanyp otyr.

Erlan Qoshanov qazirgi geosaıası, geoekonomıkalyq jáne klımattyq jaǵdaılardy, son­daı-aq sý resýrstaryn tıimdi paıdalaný máselesin eskerip, naqty áleý­mettik-ekonomıkalyq ma­ńyzy bar jobalarǵa nazar aýdarý­dy usyndy.

Buǵan qosa uıymnyń joba­lyq qyzmetine qatysty másele­lerdi ilgeriletý maqsatymen Qazaq­stannyń Aýyl sharýashylyǵy mı­nıstr­ligimen, sondaı-aq elimiz­diń ǵylymı mekemeleri jáne joǵary oqý oryndarymen yqpaldastyqty arttyrýdyń qajettiligi de sóz boldy.

Azyq-túlik qaýipsizdigi jónin­degi ıslam uıymy 2013 jyly Qazaqstannyń bastamasymen qurylǵanyn aıta ketken jón. Qazir buǵan 41 memleket múshe.