Ábilhan Qasteev atyndaǵy Memlekettik óner mýzeıinde beıneleý óneriniń birtýar tulǵasy Oral Tańsyqbaevtyń 120 jyldyq mereıtoıyna arnalǵan kórmeniń saltanatty ashylýy ótti. Kórme О́zbekstan Respýblıkasynyń mádenıet jáne ónerdi damytý qorynyń uıymdastyrýymen jáne Qazaqstan Respýblıkasynyń Mádenıet jáne aqparat mınıstrliginiń qoldaýymen uıymdastyryldy. Is-sharaǵa Qazaqstannyń Mádenıet jáne aqparat mınıstri Aıda Balaeva, О́zbekstan Respýblıkasy Prezıdentiniń kómekshisi Saıda Mırzııoeva, Almaty qalasynyń ákimi Erbolat Dosaev, sondaı-aq Qazaqstan men О́zbekstannyń jazýshylary, mádenıet jáne óner qaıratkerleri qatysty.
Kórmege Tashkent qalasyndaǵy Memlekettik óner mýzeıi men Oral Tańsyqbaevtyń mýzeı-úıinen jáne Núkis qalasyndaǵy Qaraqalpaqstan Respýblıkasy Memlekettik óner mýzeıinen kelgen, sonymen qatar Ábilhan Qasteev atyndaǵy Memlekettik óner mýzeıiniń qorynan alynǵan sýretshiniń erekshe stılin, shyǵarmashylyq murasyn jáne ulttyq keskindemeniń damýyna qosqan úlesin kórsetetin 78 keskindeme jáne grafıka týyndylary qoıyldy.
Ekspozısııa – Oral Tańsyqbaevtyń ómiri, onyń dramaǵa toly shyǵarmashylyq taǵdyry men sheberdiń qoltańbasynyń kúrdeli evolıýsııasy týraly, bastapqy kezeńderdegi modernıstik eksperımentterden bastap, tereń sımvolızm men fılosofııalyq maǵynaǵa toly monýmentaldy peızajdarǵa deıin keńinen tanystyrady. Kórmede O.Tańsyqbaevtyń orys avangardynyń jáne fransýz modernısteriniń yqpalyn kórsetetin alǵashqy týyndylaryna erekshe nazar aýdarylǵan. Eksponattar arasynda ataqty «Kúreń kúz» (1931), «Avtoportret» (1935) kartınalary, sondaı-aq Ekinshi dúnıejúzilik soǵysy kezeńindegi týyndylar men «jylymyq» kezeńiniń kórnekti peızajdary usynyldy.
О́z sózinde Aıda Balaeva Oral Tansyqbaevtyń óneri eki eldiń halqyn jaqyndastyryp, sanǵasyrlyq dostyq pen ózara túsinistikti nyǵaıtýǵa úles qosqanyn atap ótti.
«Ol týǵan jeri О́zbekstannyń kórkem tabıǵaty men taý-tasyn shynaıy ári asqan sheberlikpen beınelep, ónersúıer qaýymnyń joǵary baǵasyn aldy. Aıta keterligi, Oral Tańsyqbaev Ábilhan Qasteevpen bir jylda dúnıege kelgen. Eki azamat ta óz elderinde ulttyq kórkemsýret mektebiniń qalyptasýyna yqpal etip, keıingi tolqyn jastarǵa áser etti. Olardyń shyǵarmashylyǵy – týǵan jerine, halqyna, tabıǵatyna degen shynaıy súıispenshiliktiń kórinisi», dedi mınıstr.
Sondaı-aq Aıda Balaeva Qazaqstan men О́zbekstannyń mádenı saladaǵy belsendi yntymaqtastyǵyn atap ótti. Mınıstrdiń aıtýynsha, keıingi jyldary mádenıet kúnderi, kıno kúnderi, teatr gastrolderi men kórkemóner kórmeleri jemisti uıymdastyrylyp keledi.
Saıda Mırzııoeva óz kezeginde kórmeniń uıymdastyrylýyna rızashylyǵyn bildirip, Qazaqstan men О́zbekstan arasyndaǵy mádenı dıalog pen yntymaqtastyqtyń mańyzyn atap ótti. Kórmeni tamashalaǵan keıin S.Mırzııoeva óz telegram-arnasynda: «Bul biregeı kórme qylqalam sheberi shyǵarmashylyǵynyń bastapqy kezeńindegi eksperımentter men tolysqan kezdegi týyndylarynyń damý satylaryn kórýge keń múmkindik beredi. Tańsyqbaevtyń shyǵarmashylyǵy Qazaqstanmen tyǵyz baılanysty órken jaıdy. Ol kóp eńbektendi, Ábilhan Qasteevpen dos boldy», dep jazdy.
Oral Tańsyqbaevtyń týǵanyna 120 jyl tolýyna oraı uıymdastyrylǵan kórme osy jyldyń maýsym aıyna deıin jalǵasady. Kórme beıneleý ónerindegi kóshbasshy tulǵany ulyqtaýǵa arnalǵan ult rýhanııatyndaǵy mańyzdy mádenı oqıǵa ǵana emes, jańa kezeńderdiń zamandasy bolyp qala beretin jasampaz sýretshiniń uly murasyn zerdeleýdiń jańa bastamasy bolmaq.
ALMATY