Muqym musylman úshin kúnderdiń sultany juma bolsa, túnderdiń qaıyrlysy - qadir túni. Qasıetti Quranda Qadir túniniń naqty ýaqyty aıtylmaıdy, ál-Buharı hadısinde Ramazan aıynyń sońǵy 10 kúnindegi taq túnderdiń biri ekeni aıtylǵan. Kópshiligi muny Orazanyń 27-shi túni dep sanaıdy, dep jazady Egemen.kz.
Osyǵan saı Qazaqstan musylmandary dinı basqarmasy 2025 jylǵy dinı merekeler kestesinde 26-naýryzdan 27-sine qaraǵan túndi Qadir túni dep belgilegen bolatyn.
Qadyr túni - qazaqsha ataýy, arab tilinde Lıaılıatýl-Kadr nemese Al-Kadr dep te aıtylady. Qadir túni – berekeli Ramazan aıynda keletin qasıetti tún. Ramazan aıynyń sońǵy on túni musylman úshin óte mańyzdy. Sebebi Qadir túninde qasıetti Quran Kárim túse bastady. Sondyqtan Islam dininde bul tún erekshe baǵalanady. Quran Kárimde «Qadir» súresi bar. Osynyń ózi-aq bul túnniń asa ardaqty ekeninen habar beredi.
Musylman qaýymy bul qasıetti túnniń qazynasynan qur qalmaýǵa tyrysady. Osy túni tándi tolyq tazartyp, qulshylyqtardy kóbeıtip, Qurandy kóbirek oqyp, duǵa-tilekter jasaý abzal bolmaq.
QMDB Ramazan aıynyń sońǵy on kúninde jáne Qadir túninde myna duǵany oqýdy mysal etedi: «Aısha anamyz Paıǵambarymyzdan (oǵan Allanyń salaýaty men sálemi bolsyn): «Ýa, Allanyń elshisi! Eger men Qadir túniniń bastalǵany týraly bilsem ne aıtýym kerek», dep suraıdy. Sonda Paıǵambar: «Ýa, Alla! Rasynda, Sen – Keshirimdisiń, keshirýdi jaqsy kóresiń. Meni keshire gór», dep aıt dep úıretedi. Oqylýy: «Allahýmmá ınnáká afýýn, týhıbbýl-afýa fafý-annı».
Din ókilderi osy túni Jaratýshyǵa (s.ǵ.s.) bar yqylasymen syıynǵan pende ǵumyr boıy qulshylyq etken bolyp sanalatynyn aıtady.
Qadyr túnin úıde nemese meshitte ótkizedi. Túndi jalǵyz da, jamaǵatpen de qarsy alýǵa bolady.
Bul túni jaman ádetterden tyıylý kerek. Ǵaıbat, bos áńgimeden boıdy alys ustap, qasıetti túndi fılmder men oıyn-saýyq habarlaryn tamashalap ótkizbegen jón.