Abaı oblysynda mańyzdy áleýmettik joba – kórý qabileti nashar jáne zaǵıp azamattarǵa arnalǵan mamandandyrylǵan kitaphana qurylysy júrgizilip jatyr. Atalǵan bastama «Samuryq-Qazyna» AQ qoldaýymen biryńǵaı qaıyrymdylyq operatory – «Samruk-Kazyna Trust» qorynyń qarjylandyrýymen kórý múmkindigi shekteýli adamdar úshin bilim alýǵa, damýǵa, qarym-qatynas jasaýǵa qoljetimdi keńistik qurýǵa baǵyttalǵan.
Jańa nysan oqyrmanǵa keń aýqymdy qyzmetter usynbaq. Kitaphana qorynda Braıl qarpimen jazylǵan kitaptar, aýdıokitaptar, taktıldi basylymdar men iri qarippen jazylǵan kitaptar qamtylady. Sondaı-aq paıdalanýshylarǵa yńǵaıly bolý maqsatynda kompıýterlik resýrstar, ekrannan oqý baǵdarlamalary, ınternetke qoljetimdilik jáne beıimdelgen veb-saıttar usynylady.
Kitaphana keńistigi kópfýnksıonaldy aımaq retinde jobalanǵan. Onda oqý zaldary, kitap klýbtaryna, dáristerge, semınarlar men kórmelerge arnalǵan alańdar, sondaı-aq jaıly demalys aımaqtary qarastyrylǵan. Munyń bári – oqýǵa, áleýmettenýge jáne tulǵalyq damýǵa qolaıly orta. Jańa kitaphana jyl saıyn 20 000 adamǵa deıin qyzmet kórsetip, bilim men oqý resýrstaryna qoljetimdilikti arttyrady.
Qazirgi ýaqytta qurylys jumystary 90%-ǵa aıaqtalyp, ǵımarattyń ishki árleý ǵana qaldy. Jaqyn arada kitaphana esigin aıqara ashyp, árbir azamat úshin bilim men mádenıet ornyna aınalady.
Osylaısha, «Samruk-Kazyna Trust» qoldaýymen qoǵamdyq ınfraqurylymǵa barlyq azamattar úshin teń múmkindikterdi qamtamasyz etetin ınklıýzıvti standarttar engizilip jatyr. Jańa kitaphana qurylysy – jaı ǵana áleýmettik joba emes, árbir jannyń fızıkalyq múmkindikterine qaramastan, bilim men oqý resýrstaryna erkin qol jetkizýine baǵyttalǵan mańyzdy qadam.
Aıta keteıik, ótken jyly «Samruk-Kazyna Trust» qorynyń qoldaýymen Semeı qalasynda Abaı atyndaǵy kitaphana qaıta jóndeýden ótip, sondaı-aq kórý qabileti nashar jáne zaǵıp jandarǵa arnalǵan arnaıy kitaphana ǵımaraty qajetti qural-jabdyqtarmen tolyqtyryldy. Bul bastamalar aqparatqa qoljetimdilikti keńeıtip, kitaphanalyq keńistikterdiń jaılylyǵyn arttyrdy.