Otan qorǵaýshylar Aqmola, Abaı, Soltústik Qazaqstan, Qostanaı, Batys Qazaqstan, Atyraý, Aqtóbe oblystarynyń jergilikti qyzmetteri men halqyna jan-jaqty kómek kórsetip jatyr, dep habarlaıdy Egemen.kz.
Qorǵanys mınıstrliginiń baspasóz qyzmeti málim etkendeı, atalǵan aımaqtardyń jergilikti aýmaqtyq qorǵanys brıgadalary men áskerı bólimderdiń jeke quramy ózen jaǵalaýlaryn nyǵaıtýmen, qaptarǵa topyraq salý-tóseý jumystarymen aınalysyp jatyr.
Abaı oblysynda áskerı qyzmetshiler Aıagóz aýdanynyń Mamyrsý aýylyna kómek kórsetýde. Aıagóz ózeniniń jaǵasyna topyraq tasymaldaý úshin 10 KamAZ kóligi men júk tıegish bólindi.
Aqmola oblysynyń Atbasar, Aqkól qalalarynda áskerı qyzmetshiler qap daıyndaýmen aınalysyp jatyr.
Soltústik Qazaqstan oblysy aýmaqtyq qorǵanys brıgadasynyń jeke quramy Zarechnyı jáne Teplıchnyı eldi mekenderinde erigen qar sýyna tosqaýyl qoımaq. Beskól kentindegi jaǵalaýdy nyǵaıtý úshin 44813 bóliminiń áskerı qyzmetshileri qum salynǵan qaptardy daıyndaý jumystaryna tartylǵan.
Qostanaı oblysynda jergilikti brıgadanyń jaýyngerleri Novoselovka aýylynda jumys júrgizip, Obaǵan ózeniniń jaǵalaýyn nyǵaıtty.
Aýmaqtyq qorǵanys brıgadasynyń jeke quramy Batys Qazaqstan oblysy Qaratóbe kentindegi sý tasqynyna qarsy is-sharalarǵa tartyldy.
Atyraý qalasynda áskerı bólimderdiń áskerı qyzmetshileri jaqyn mańdaǵy Turǵyzba, Shoqpartoǵaı, Baqashy, Qulsary eldi mekenderinde jumys júrgizip jatyr.
Aqtóbe oblysyna Qonaev garnızony ınjenerlik-saperlik brıgadasynyń áskerı qyzmetshileri kómekke keldi. Olar ózderimen birge pontondyq kópir parkiniń elementterin, onyń ishinde pontondyq kópir segmentteri bar eki iri tonnajdy jer ústi kóligi (KrAZ-255b), qalqymaly tasymaldaýshy, sondaı-aq Kamaz jáne KrAZ kólikteriniń bazasyndaǵy eki súıretkish motorly qaıyq ala kelgen. Áskerı ınjenerler kez kelgen ýaqytta Oıyl ózenine ýaqytsha ótkel ornalastyrýǵa daıyn.
Sý tasqynyna qarsy is-sharalarǵa barlyǵy 2300-ge jýyq áskerı qyzmetshi jáne 770-ten asa tehnıka jumyldyrylǵan.