Memleket basshysy óziniń shaqyrýyn qabyl alyp, Qazaqstanǵa alǵash ret resmı saparmen kelgen Natasha Pırs-Mýsarǵa rızashylyǵyn bildirdi, dep jazady Egemen.kz.
Prezıdenttiń aıtýynsha, Slovenııa – Qazaqstannyń Eýropa Odaǵyndaǵy mańyzdy seriktesi ári eki eldiń qarym-qatynasy dostyq jáne ózara syılastyq rýhynda nyǵaıyp keledi. Onyń aıqyn dáleli – byltyr Lıýblıana qalasynda Qazaqstan Elshiliginiń ashylýy.
«Men muny yqpaldastyǵymyzdy damytý jolyndaǵy mańyzdy qadam dep sanaımyn. Qazaqstan eki el arasyndaǵy dostyqty odan ári tereńdetýge múddeli. Sondyqtan bul sapardyń mán-mańyzy aıryqsha. Biz búgin qurmetti Prezıdent Pırs-Mýsar hanymmen mazmundy ári jemisti kelissóz júrgizdik. Qazaq-sloven yntymaqtastyǵynyń aıasyn keńeıtý jolyn talqyladyq. Naqty ýaǵdalastyqtarǵa qol jetkizdik. Birlesken málimdeme qabyldadyq. Sondaı-aq búgin birqatar úkimetaralyq jáne mekemearalyq kelisim jasaldy. Sonyń ishinde densaýlyq saqtaý, týrızm, bilim berý salalaryna qatysty mańyzdy qujattar bar. Bul kelisimderdi tıimdi iske asyrý arqyly eki eldiń yntymaqtastyǵyn jandandyra túsemiz dep senemin», dedi Qasym-Jomart Toqaev.
Prezıdentter ekijaqty saýda-ekonomıkalyq jáne ınvestısııalyq baılanystardy arttyrýǵa kelisti. Qazir qos memleket farmasevtıka, jańartylatyn energııa, ınjenerııa, telekommýnıkasııa baǵyttarynda mańyzdy jobalardy júzege asyryp jatyr. Memleket basshysy elimizde osy salalarda 20-ǵa jýyq sloven kompanııasy tabysty jumys istep jatqanyna toqtalyp, ekonomıkalyq baılanystardyń aýqymyn odan ári keńeıtýdiń mańyzyn atap ótti. «Taý-ken, jasyl energetıka, atom ónerkásibi, sıfrlandyrý jáne ınnovasııa, densaýlyq saqtaý, týrızm salalarynda tyń jobalardy júzege asyrýǵa kelistik. Qolda bar múmkindikti tıimdi paıdalaný úshin Úkimetaralyq komıssııanyń jumysyn jandandyryp, onyń qyzmetin jańa deńgeıge kóterýge shaqyrdym. Eki el bıznes ókilderiniń baılanysyn tereńdetý – mańyzdy mindettiń biri. Osyǵan oraı, «Qazaqstan – Slovenııa» iskerlik keńesin qurý máselesin talqyladyq. Elimizge Slovenııanyń iri kásipkerleri de keldi. Erteń olardyń qatysýymen bıznes-forým ótedi. Bul is-shara osy baǵyttaǵy jumysty kúsheıtýge yqpal etedi dep oılaımyn», dedi Qazaqstan Prezıdenti.