Sıfrlyq damý, ınnovasııalar jáne aeroǵarysh ónerkásibi mınıstrligine qarasty Telekommýnıkasııalar komıtetiniń tóraǵasy Damır Seısembekov qazaqstandyq poıyzdarda ınternet qashan qoljetimdi bolatynyn aıtty, dep habarlaıdy Egemen.kz.
Onyń aıtýynsha, joba qańtar aıynda bastalǵan.
«QTJ-nyń málimeti boıynsha, bizdiń elde «Talgo» poıyzdary jumys isteıtin 16-ǵa jýyq baǵyt bar. Tehnıkalyq turǵyda búginde poıyzdardyń ishinde ınternetti tek osy poıyzdar taratýǵa qaýqarly. Tıisinshe, bul júıeni keńestik kezeńnen qalǵan eski júıege engizý múmkin emes.Sondyqtan biz qazir QTJ-men osy máseleni pysyqtap, barlyq 16 baǵytta ınternetti tolyqqandy qamtamasyz etý josparlaryn belgilep jatyrmyz. Bul bıletter qunyna áser etpeýi úshin olarmen kelissózder júrgizemiz», dedi Damır Seısembekov.
Sonymen qatar ol qazirgi tańda poıyzdardyń birinde ınternet bar ekenin aıtty.
«Astana men Almaty arasynda kóptegen poıyzdar júredi, biraq olardyń bireýinde ǵana ınternet bar. Qazir belsendi testileý kezeńi júrip jatyr, jalpy keri baılanys jaqsy. Ýaqyt týraly jańylystyrǵym kelmeıdi, biraq birinshi jartyjyldyqtyń sońynda tehnıkalyq pılottyq jumystyń qorytyndysy shyǵarylady dep oılaımyn. Joǵaryda aıtqanymdaı, ınternet ornatý josparly túrde, eń aldymen jolaýshylar aǵyny kóp baǵyttarda júrgiziledi. Sondaı-aq mobıldi qamtý múldem joq baǵyttar boıynsha júretin poıyzdar bar, olardy birinshi kezekte qamtamasyz etemiz», dedi ol.
Onyń aıtýynsha, jumys bıyl da jalǵasady, biraq bul prosestiń qashan tolyq aıaqtalatynyn aıtý qıyn.