Mıanmadaǵy joıqyn jer silkinisinen keıin bes kún ótkende, el astanasy Neıpıdodaǵy qonaqúıdiń úıindileri astynan 26 jastaǵy er adam aman-esen qutqarylǵan. Bul qutqarý operasııasyn Mıanma men Túrkııanyń qutqarýshylary birlesip júzege asyrdy, dep habarlaıdy Egemen.kz.
Jer silkinisi saldarynan qaza tapqandar sany 2 700-den asyp, bul kórsetkishtiń 3 000-nan asýy múmkin dep boljanǵan.
Aıta keteıik, zilzaladan eń kóp zardap shekken aımaqtar – Mandalaı jáne Sagaın qalalary. Aman qalǵandar kóshede túneýge májbúr bolǵan.
Jergilikti bıliktiń habarlaýynsha, qıraǵan ǵımarattardyń astynda qalǵan máıitterdiń jaǵymsyz ıisi búkil apat aımaǵyna taralǵan. Sonymen qatar óńirde sý, azyq-túlik jáne dári-dármek jetispeýshiligi baıqalǵan.
Qutqarý jumystary áli de jalǵasyp jatyr, alaıda ýaqyt ótken saıyn tiri qalǵandardy tabý múmkindigi azaıyp keledi. Halyqaralyq uıymdar men jergilikti bılik zardap shekkenderge qoldan kelgen kómekti kórsetip jatyr.