Qaraǵandy qalasyndaǵy E.A. Bóketov atyndaǵy ýnıversıtettiń jataqhanasynda órt bolyp, 10 stýdent aýrýhanaǵa jetkizilgen, dep habarlaıdy Egemen.kz.
Oblystyq tótenshe jaǵdaılar departamentiniń málimetinshe, órt birinshi qabattaǵy qoqys qubyrynan shyqqan. Jalyn 1,5 sharshy metr aýmaqqa taraǵan. Qutqarýshylar baspaldaq arqyly tórt adamdy evakýasııalaǵan. О́rt 19 mınýt ishinde tolyq sóndirildi.
Densaýlyq saqtaý basqarmasynyń habarlaýynsha, zardap shekken 10 stýdent aýrýhanaǵa jetkizilgen. Dárigerler olardyń jaǵdaıyn turaqty dep baǵalap otyr. Qazirgi ýaqytta qosymsha tekserýler júrgizilip, keıin naýqastar úı jaǵdaıynda em qabyldaıdy.
Tótenshe jaǵdaıdyń sebebi anyqtalyp jatyr.