Dúnıejúzilik densaýlyq saqtaý uıymynyń (DDSU) bas dırektory Tedros Adanom Gebreıesýs álemdi jańa pandemııaǵa daıyn bolýǵa shaqyrdy. Onyń aıtýynsha, qazirgi ýaqytta qaýipti vırýs erteń-aq taralýy múmkin, dep habarlaıdy Egemen.kz.
Gebreıesýs DDSU-ǵa múshe memleketterdiń elshileri aldynda sóılegen sózinde COVID-19 pandemııasy qazirgi qaqtyǵystar, geosaıası jáne ekonomıkalyq daǵdarystar aıasynda alystaǵy estelik sııaqty kórinetinin atap ótti. Alaıda kelesi pandemııanyń álemdegi jaǵdaıdyń turaqtanýyn kútpeı, kez kelgen ýaqytta bastalýy múmkin ekendigin eskertti.
«Ol 20 jyldan keıin de bolýy múmkin, erteń de bastalyp ketýi ǵajap emes. Biz oǵan daıyn bolýymyz kerek. Sondyqtan da álem sizderdiń qatysýlaryńyz ben kóshbasshylyqtaryńyzǵa muqtaj. DDSU-nyń pandemııaǵa qarsy kelisimin sońyna deıin jetkizý kerek», dedi ol.