Búgin Almatyda «Jeńistiń esteligi: urpaqtar men halyqtar birligi» atty konferensııa ótti. Kezdesý barysynda qazaqstandyq jáne reseılik sarapshylar eki el jastaryn tarıhı estelikterdi saqtaýǵa shaqyryp, tarıhı ortaq máselelerdi talqylady. Bul is-shara Jeńistiń 80 jyldyǵyn birlese atap ótýdiń bastamasy boldy, dep jazady Egemen.kz.
Konferensııa jumysyna QR Prezıdenti Ákimshiliginiń Ishki saıasat bóliminiń meńgerýshisi Abzal Núkenov, QR Mádenıet jáne aqparat mınıstri Aıda Balaeva, Reseı Federasııasy Prezıdentiniń shet eldermen aımaqaralyq jáne mádenı baılanystar jónindegi basqarmasy basshysynyń orynbasary Anton Rybakov, Reseı Federasııasynyń Jastar isi jónindegi federaldyq agenttigi basshysy Grıgorıı Gýrov, eki eldiń ǵalymdary men sarapshylary, sondaı-aq belsendi jastar qatysty.
Aıda Balaeva qatysýshylardy aıtýly mereıtoımen quttyqtap, otandastarymyzdyń Jeńiske qosqan úlesi týraly keńinen baıandady.
Qazaqstandyqtar Máskeý, Stalıngrad, Lenıngrad túbinde erlikpen shaıqasyp, Baltyq elderi, Ýkraına, Polsha, Germanııa, Fransııa, Qytaı jerlerinde partızandyq qozǵalystarǵa qatysty.
Qazaqstandyq Álııa Moldaǵulova, Mánshúk Mámetova, Talǵat Bıgeldınov, Baýyrjan Momyshuly, Qasym Qaısenov, Leonıd Beda, Raqymjan Qoshqarbaev, Saǵadat Nurmaǵambetov, Sergeı Lýganskıı esimderi Jeńis kitabyna altyn áriptermen jazyldy.
«Keńes Odaǵynyń Batyry «Altyn juldyz» marapatyn alǵan qazaqstandyqtardyń naqty sany – 528 adam. Alaıda, barlyǵy tek sanmen ólshenbesi anyq. О́mirin qurban etip, júzdegen myń adamnyń ómirin saqtap qalǵan, biraq marapattalmaǵan jandar da óte kóp», dedi Aıda Balaeva.
Mınıstr «Tizimde joq» fılmin atap ótip, onda Brest qamalyn qorǵaǵan 3000 qazaqstandyq týraly baıandalǵanyn sóz etti.
«Basqa da jaýyngerlermen birge ıyq tirese shaıqasyp, qamaldy qorǵaǵandardyń qatarynda saıası jetekshiniń orynbasary Qasym Batalov, kishi serjant Grıgorıı Býıanov, áskerı feldsher Vladımır Dosenko, tankıst Qasym Jármenov, radıst Ǵabbas Jumatov, vzvod komandıriniń orynbasary Nyǵmet Ilııasov, serjant Kópesbaı Imamqulov, saıası jetekshi Murtaza Karslyev, pýlemetshi Evgenıı Kachanov, avtomatshy Sergeı Lebedev bar. Brest qalasynyń vokzaly mańynda 44-atqyshtar polki shaıqasyp, onda bizdiń áriptesimiz, «Lenınskaıa smena» gazetiniń burynǵy jaýapty hatshysy Pavel Goncharov erlikpen qaza tapty», dedi mınıstr.
Jaý basyp alǵan aýmaqtardaǵy partızandyq qozǵalysqa 3,5 myńnan astam qazaqstandyq qatyssa, Qazaqstan jerinen áskerge shaqyrylǵan 300-ge jýyq sarbaz fashıstik konslagerlerden qashyp shyǵyp, Italııa men Fransııadaǵy Qarsylasý qozǵalysynyń qatarynda shaıqasqan.